Universis Christi fidelibus ad quos presens scriptum pervenerit Johannes filius Johannis de Denton[] salutem in Domino Noverit universitas vestra me pro salute anime mee et animarum antecessorum et successorum meorum concessisse dedisse et hac presenti carta confirmasse Deo et ecclesie sancte Marie Magdalene de Lanrecost[] et canonicis regularibus ibidem Deo servientibus communam pasture ad omnia et omnigena averia sua propria per totam pasturam meam de Denton[] ubique infra villam et extra et etiam eandem communam dedi concessi et confirmavi tribus hominibus dictorum canonicorum in Holmo suo inter Polkedith[] et Poltertenanec manentibus quandocunque tot homines in dicto Holmo voluerint habere manentes Quare volo et pro me et pro heredibus meis concedo quod dicti canonici et eorum homines in dicto Holmo manentes habeant communam pasture antedictam ubique infra villam de Denton[] et extra ad omnia et omnigena averia ut supradictum est libere pacifice et quiete ab omni servicio seculari secundum tempora anni in tempore videlicet estivo ubique extra sepes et alias clausturas et statim post amotionem bladorum et fenorum ubique tam infra clausturas et sepes quam extra communiter usque ad aliam inbladationem sine impedimento vel aliqua perturbatione mei vel heredum meorum in liberam puram et perpetuam elemosinam inperpetuum salvis mihi et heredibus meis quod possumus essartare de boscis nostris et terram lucrabilem facere et aliter novas terras si voluerimus colere de moris et vastis et circa eas cum seminate fuerint clausturas facere Ita videlicet quod statim post amotionem fructuum amoveantur clausture ut averia antedicta intrare possint et uti pastura sua tam infra clausturas quam extra usque ad aliam inbladationem Si autem averia antedictorum canonicorum seu hominum suorum predictorum in dicto Holmo manentium capiantur super semina hyemalia mea seu heredum meorum aut hominum nostrorum in Denton[] et dampnum fecerint illud per visum bonorum et legalium hominum emendent Si dampnum non fecerint recacientur in pasturam suam sine dampno seu gravamine Concessi etiam predictis canonicis et pro me et heredibus meis inperpetuum quietum clamavi totum jus quod habui in predicto Holmo quolibet anno ab inbladatione eiusdem usque ad festum omnium sanctorum ita quod ego vel heredes mei seu homines nostri in dicto Holmo de cetero nullum jus sive de communa seu aliquo alio modo clamare vel habere possumus ab imbladatione eiusdem ut supradictum est usque ad dictum festum omnium sanctorum Et si quod hucusque habuimus illud penitus relinquimus et eisdem canonicis quietum clamavimus Et si averia mea vel heredum meorum seu hominum nostrorum in dicto Holmo ante dictum festum intraverint capiantur et infra predictum Holmum inparcentur et antequam deliberentur detur pro quibuslibet iiiior equis seu equabus unus denarius pro quibuslibet octo bobus vel vaccis seu aliis junioribus averiis eiusdem generis unus denarius pro iiiior porcis unus denarius pro quatuor viginti bidentibus unus denarius Si autem argentum non habeatur promptum quantum debeat solvi detur sufficiens vadium servienti illud duppliciter valens usque ad terminum octo dierum Ita quod sub pena amissionis vadimonii infra ebdomadam primam post captionem averiorum solvatur Et si super blada seminata fuerint dampnum quod fecerint per visum legalium hominum emendetur Et si dicti canonici voluerint in dicto Holmo berkariam facere volo quod sufficientem habeant egressum et ingressum de dicta berkaria ad pasturam suam prenominatam Et ego et heredes mei omnia supradicta predictis Deo et canonicis warantizabimus acquietabimus et defendemus ut liberam puram et perpetuam elemosinam inperpetuum In cuius rei testimonium hoc presens scriptum sigilli mei impressione roboravi Testibus Ranulfo de Vall[] Willelmo de Leuersdal[] Willelmo de Mora Roberto de Camboc Eudone de Denton[] Hugone clerico Johanne filio Anketini Alexandro Baldewyn Ada de Quinhov et aliis multis Datum apud Lanrecost[] die Jovis proxima post festum sancti Marci evangeliste anno gracie millesimo ducentesimo septuagesimo tertio

Source Fulltext: Lanercost Cartulary. J. M.Todd. Cumberland and Westmorland Antiquarian and Archaeological Society Record Series, V.11. Surtees Society. Athenaeum Press. Durham. 1997.