Universis sancte matris ecclesie filiis ad quorum noticiam presentes litere pervenerint officialis curie Ebor salutem et pacem in terris et gloria in excelsis Quanto curiosius inimicus humani generis circuit [querens] quem devoret et ut sue insaciabilis malicie voraginem uberius excerceat pro seminanda inter Dei servos discordia per quam caritas exilio traditur et nonnuncquam circa litigiosum amfractus contra debitum justicie consumuntur tributa animarum egencium vigilancius machinatur tanto habet pastor solicitudinem circa pacem et quietem subditorum ut divinis obsequiis rejecto litium obstaculo uberius vacent studiosius laborare Hec itaque venerabilis pater dominus Johannes Dei gracia Ebor archiepiscopus Anglie primas profunda meditacione revolvit dum ad vicariam parochialis ecclesie de Tadecastre sue dyocesis quam religiosi viri abbas et conventus de Sallai Cisterciensis ordinis ex concessione apostolica in usus proprios optinent cujus vero vicarie status certis finibus hactenus non claudebatur suum dirigens intuitum nobis taxandi et ordinandi vicariam eandem commisit per suas patentes literas potestatem cujus tenor per omnia talis est Johannes permissione divina Ebor archiepiscopus Anglie primas dilecto in Christo filio officiali nostro Ebor salutem graciam et benediccionem De vestra circumspecta industria plenius confidentes taxandi et ordinandi vice nostra vicariam ecclesie de Tadecastre quam religiosi viri abbas et conventus de Sallai in proprios usus optinere noscuntur ad estimacionem viginti marcarum juxta formam literarum apostolicarum de appropriacione dicte ecclesie et hujusmodi estimacione facientium mencionem vocatis coram vobis dictis religiosis et vicario ecclesie memorate vobis testimonio presencium committimus potestatem Bene valete Datum apud Cawode vij idus Augusti anno gracie m cc nonagesimo et pontificatus nostri quinto Nos igitur premissa auctoritate fulciti vocatis partibus coram nobis et religiosis viris abbate et conventu predictis per fratrem Robertum de Fasceby eorum commonacum et procuratorem a parte una ac domino Rogero de Saxtona perpetuo vicario ipsius ecclesie de Tadecastre per Otonem de Rivill clericum procuratorem suum comparentibus ex altera facta prius in presencia partium de valore porcionum subscriptarum et omnibus ecclesie memorate per nos inquisicione fidedigna in quam consenserat pars utraque invocata Sancti Spiritus gracia pro tollenda penitus discordie materia quam solet communio excitare ac pro pace et unitate habend firmius in futurum vicariam predicte ecclesie de Tadecastre per porciones infrascriptas taxamus quas perpetuo et inseparabiliter eidem vicario ordinando realiter assignamus Porciones autem in quibus vicaria ipsius ecclesie consistere debet et quibus vicarius ejusdem contentus existat sunt subscripte videlicet quod habeat vicarius qui nunc est in ecclesia antedicta et quicumque ejus successor pro tempore fuerit in eadem omnimodas oblaciones per annum decimam lane lini olerum porcorum pomorum casei buturi lactis ovorum vitulorum pullorum aucarum gallinarum porcellorum apum et mellis cum decimis serviencium in quadragesima scilicet mercenariorum mercatorum pistorum carpentariorum quarreatorum cementariorum caprarum et calcem comburencium dum pro tempore fuerint capre vel calcem comburentes in parochia de Tadecastre item carectariorum braciatricum necnon cum omnibus panibus oblatis ad altare per annum cum mortuariis sponsalibus purificacionibus et redditu annuali duodecim denariorum in capella de Cathertona cum decima feni de Smaus de Stuttona et de Heselwode cum decima prati domini Willelmi Vavasoris in prato de Tadecastre item habeat decimam feni provenientem de pratis bovatarum in pratis de Tadecastre ex illa parte aque in qua sita est ecclesia de Tadecastre ita quod de prato dominico et prato grangie nichil omnino percipiat Habeat eciam denarios de pane benedicto cum siragio et candelis die Purificacionis oblatis Mansionem autem pro qua abbas et conventus de Sallai dimidiam marcam annuatim percipere consueverunt habeat idem vicarius suo perpetuo liberam absque aliqua pensione et de nutrimentis animalium propriorum immunis erit a prestacione decimarum Et est sciendum quod vicarius qui pro tempore fuerit clericum servientem ecclesie de Tadecastre suis sumptibus sustinebit et omnia onera debita et consueta tam diocesani quam archidiaconi et officialium suorum ac alia onera supportabit prout in litera domini pape super hoc confecta plenius continetur Tenor autem procuratorii dictorum religiosorum talis est Universis Christi fidelibus ad quos presentes littere pervenerint frater T abbas de Sallai et ejusdem loci conventus salutem in Domino sempiternam In omnibus causis et negociis motis et movendis a nobis seu contra nos aut nos vel monasterium nostrum seu eciam ecclesiam de Tadecastre quam in proprios usus optinemus ex officio judicis vel jurisdiccionis qualitercumque contingentibus coram quibuscumque judicibus ordinariis seu delegatis vel eorum commissariis conservatoribus exsecutoribus seu quamcunque cognicionem habentibus contra quoscumque adversarios nostros quibuscumque diebus et locis fratrem Robertum de Fayceby procuratorem nostrum facimus ordinamus et constituimus per presentes dantes eidem specialem potestatem agendi defendendi excipiendi in animas nostras tam de calumpnia quam de veritate dicenda jurandi et quodlibet ge[n]us liciti sacramenti prestandi in integrum restitucionem et status nostri reformacionem necnon et expensas et interesse petendi et super eis jurandi et eas accipiendi alium procuratorem substituendi substituciones revocandi officium procuratoris reassumendi et excercendi juramentum deferendi et delatum prestandi appellandi appellaciones prosequendi et omnia alia faciendi que per verum et legitimum procuratorem poterunt expediri ratum et gratum habituri quicquid idem Robertus aut substitutus ab eo nomine nostro in premissis duxerit faciendum pro eodem eciam et ejus substituto judicatum solvi sub hypotheca rerum monasterii nostri promittimus caucionem Hoc idem judicibus quibuscumque et partibus ac omnibus quorum interest tenore presencium significamus In cujus rei testimonium sigillum nostrum presentibus est appensum Datum apud Sallai ij kal Julii anno gracie m cc nonagesimo Tenor eciam procuratorii predicti Rogeri de Saxtona vicarii de Tadecastre talis est Universis Christi fidelibus ad quos presentes littere pervenerint Rogerus de Saxtona perpetuus vicarius ecclesie de Tadecastre salutem in Domino In omnibus causis et negociis motis vel movendis personam meam qualitercumque contingentibus coram quibuscumque judicibus ordinariis seu delegatis vel eorum comissariis quibuscumque diebus et locis dilectum mei in Christo Otonem de Ryvill patrem meum clericum ordino facio et constituo procuratorem meum per presentes dans eidem potestatem specialem et generalem mandatum nomine meo agendi defendendi excipiendi replicandi ponendi posicionibus respondendi status mei reformacionem et in integrum restitucionem necnon et expensas quociens opus fuerit petendi et ipsas et fructus vicarie mee in omnibus et singulis recipiendi stipendium sacerdoti meo solvendi ac super eisdem jurandi juramentum tam de calumpnia quam de veritate dicenda et quodlibet aliud genus liciti sacramenti in animam meam prestandi appellandi appellacionem prosequendi et alium procuratorem loco suo substituendi substitutum revocandi et omnia alia et singula faciendi que ego facerem si presens essem personaliter Pro eodem eciam Otone et ejus substituto rem ratam haberi et judicatum solvi sub hypotheca rerum mearum donec ipsum vel ipsos revocavero promitto In cujus rei testimonium presenti procuratoris sigillum meum apposui Datum apud Saxtona iij idus Junii anno gracie m cc nonagesimo In quorum omnium testimonium sigillum nostri officii presentibus est appensum Datum Ebor x kalendas Novembris anno Domini m cc nonagesimo

Source Fulltext: Chartulary of the Cistercian Abbey of St. Mary of Sallay in Craven. Joseph MacNulty. Yorkshire Archaeological Society, V.99. Yorkshire Archaeological Society. West Yorkshire Print Co. Wakefield. 1934.