Placita ad Novum Castrum super Tynam coram Hugone de Cressingham et sociis suis justiciariis ultimo itinerantibus in comitatu Northumbrie in crastino Sancti Hillarii anno regni regis Edwardi vicesimo primo Robertus filius Rogeri Johannes de Brigham Johannes le Cue Rogerus le Gra Nicholaus Groychard Robertus le Provost alias coram T de Metyngham et sociis suis justiciariis de Banco summoniti fuerunt ad respondendum roberto de Thrckelawe de placito quare ceperunt averia et secures ipsius Roberti de Throkelawe et ea injuste detinuerunt contra vadium etc Et unde queritur quod predicti Robertus filius Rogeri et alii die Veneris proxima post festum sancte Marie Magdalene anno domini regis nunc decimo nono ceperunt tres secures ipsius Roberti de Throkelawe in bosco suo de Throklawe qui vocatur Helley et illas asportaverunt usque ad manerium ipsius Roberti filii Rogeri de Neuburn Et die Mercurii proxima ante festum Sancti Bartholomei apostoli anno predicto ceperunt iij bovettos et unam juvencam ipsius Roberti de Throklawe in villa de Throklawe in quodam loco qui vocatur Bradeschawe et illos fugaverunt usque ad faldam predicti Roberti filii Rogeri in predicta villa de Neuburn Et die Dominica proxima post festum sancti Bartholomei eodem anno ceperunt quatuor boves ipsius Roberti de Throckalewe in predicta villa de Throklawe in quodam loco qui vocatur Grymeslawbruk et illos fugaverunt usque ad manerium ipsius Roberti filii Rogeri de Neuburn Et die mercurii proxima post festum Sancti Michaelis eodem anno ceperunt quatuordecim boves vj vaccas tres bovettos et ij juvencas ipsius Roberti de Throcklawe in predicta villa de Throcklawe in quodam loco qui vocatur Ulnfriding et illos fugaverunt usque ad parcum ipsius Roberti filii Rogeri de Neuburn et illos ibidem detinuerunt contra vadium etc et inde producit sectam Et Robertus filius Rogeri et alii per attornatum suum venerunt et defenderunt vim et injuriam quando etc Et Robertus filius Rogeri respondit pro se et aliis et bene cognovit quod cepit predicta averia et similiter predictas secures et juste etc Et quo ad capcionem predictarum securum dicit quod predictus Robertus de Throcklawe tenet predictum boscum de Throcklawe de ipso Roberto filio Rogeri in quo bosco idem Robertus de Throkelawe[] nichil de grosso bosco succidere potest nisi per visum forestariorum ipsius Roberti filii Rogeri et quia ipse invenit predictum Robertum de Throclawe quercus grossas in predicto bosco succidentem in absencia forestariorum predicti Roberti filii Rogeri cepit ipse predictas secures etc Et quo ad capcionem predictorum trium bovettorum et unius juvence dicit quod predictus Robertus de Throkelawe[] tenet de eo quedam tenementa in predicto loco de Bradeschawe per servicium faciendi eidem Roberto filio Rogeri decem arruras per annum cum decem carucis per unum diem in anno etc Et quo ad terciam capcionem dicit quod predictus Robertus de Throkelawe tenet de eo quedam tenementa in predicto loco de Grymeslawcerok per servicium faciendi eidem Roberto filio Rogeri decem herciaturas per annum per unum diem etc Et quo ad quartam capcionem predictorum averiorum dicit quod predictus Robertus de Throkelawe tenet de eo quedam tenementa in predicto loco de Hulynfriding[] per servicium inveniendi eidem Roberto filio Rogeri viginti homines ad blada ipsius Roberti filii Rogeri in autumpno metenda ad tres precarias per tres dies integros scilicet quolibet die viginti homines etc et eciam inveniendi eidem Roberto decem homines ad blada ipsius Roberti filii Rogeri metenda per dimidium diem usque ad horam nonam sine cibo etc et eciam cariandi fenum ipsius Roberti filii Rogeri per tres dies etc cum decem carrectis etc De quibus serviciis quidam Johannes filius Roberti avus predicti Roberti filii Rogeri cuius heres ipse est fuit seisitus per manus cujusdam Roberti de Throkelawe avi predicti Roberti de Throkelawe cujus heres ipse est Et quia predicta servicia ei a retro fuerant de anno domini regis nunc decimo nono cepit ipse predicta averia in feodo suo sicut ei bene licuit etc Et predictus Robertus de Throkelawe dicit quod predictus Robertus filius Rogeri predictam capcionem justam vocare non potest quia dicit quod predictus Robertus filius Rogeri nichil juris seu dominii clamare potest In predicto bosco nisi tantum communam ad averia sua de manerio ipsius Roberti filii Rogeri de Neuburn ibidem pascenda Et dicit quod ipse et antecessores sui a tempore quo non extat memoria fuerunt in seisina succidendi quercus et alium grossum boscum in predicto bosco pro voluntate sua sine licencia et visu forestariorum predicti Roberti filii Rogeri vel antecessorum suorum Et de hoc ponit se super patriam etc Dicit eciam quod predictus Johannes avus etc nunquam post primam transfretacionem domini Henrici regis patris domini regis nunc in Wasconiam fuit in seisina de dietis serviciis per manus ipsius Roberti avi etc Et de hoc ponit se super patriam et Robertus filius Rogeri similiter Ideo preceptum est vicecomiti quod venire faciat hic a die sancti Michaelis in unum mensem xij etc qui nec etc ad recognoscendum in forma predicta quia tam etc Et modo veniunt partes hic et similiter juratores qui dicunt super sacramentum suum quod manerium de Neuburn quod dominus Robertus modo tenet fuit in seisina domini Johannis regis avi domini regis nunc quo tempore villa de Throklawe cum predicto bosco fuit membrum predicti manerii de Neuburn ita quod eo tempore tenentes manerii de Throklawe nullum meremium capere potuerunt in predicto bosco de arboribus fructus portantibus nec de aliis sine visu forestariorum ipsius Roberti Et dicunt quod idem dominus Johannes feoffavit quemdam Robertum filium Rogeri proavum ipsius Roberti filii Rogeri de predicto manerio de Neuburn [...] tenend adeo integre et libere sicut idem Johannes rex illud tenuit Et dicunt quod tempore illius Roberti filii Rogeri proavi etc tenentes de Throklawe nichil ceperunt in predicto bosco de groso bosco nec de alio sine visu forestariorum predicti Roberti filii Rogeri proavi etc Et dicunt quod post decessum predicti Roberti filii Rogeri proavi etc quidam Johannes filius Roberti intravit in eodem manerio de Neuburn ut filius et heres et illud eodem modo tenuit toto tempore suo post cujus decessum idem manerium de Neuburn assignatum fuit cuidam Ade de Bailliol uxori ipsius Johannis in dotem etc Que quidem Ada similiter tenuit manerium illud per aliquod tempus quousque quidam Robertus de Throklawe avus istius Roberti de Throklawe qui fuit dominus de Throklawe et senescallus predicte Ade cepit de predicto bosco pro voluntate sua aliquando per visum forestariorum aliquando sine visu forestariorum Et post decessum ipsius Ade iste Robertus intravit in predictum manerium de Neuburn ut de jure et hereditate sua et habuit quemdam senescallum nomine Robertum patrem istius Roberti de Throklawe qui suo tempore cepit de predicto bosco aliquando per visum forestariorum et aliquando sine visu forestariorum Et postquam amotus fuerit de servicio predicti Roberti filii Rogeri iste Robertus de Throklawe nec predictus Robertus pater suus aliquid ceperunt in predicto bosco sine forestariis ipsius Roberti filii Rogeri nisi esset aliquando occulte etc quin semper impediti fuerunt per ballivos suos etc Dicunt eciam quod predictus Johannes avus istius Roberti filii Rogeri fuit in seisina de predictis serviciis per manus Roberti avi istius Roberti de Throklawe et similiter per manus patris istius Roberti de Throklawe post primam transfretacionem domini Henrici regis patris domini regis nunc in Wasconiam Ideo consideratum est quod predictus Robertus filius Rogeri habeat returnum predictarum securium et predictorum averiorum etc Et quod predictus Robertus de Throklawe nichil capiat per juratam istam sed sit in misericordia pro falso clamore etc

Source Fulltext: Percy Cartulary. M. T. Martin. Surtees Society, V.117. Surtees Society. Andrews & Co. Durham. 1911.