Omnibus sancte matris ecclesie filiis presentes literas visuris vel audituris Willelmus miseracione divina Exon ecclesie minister humilis eternam in Domino salutem Quoniam omnes stabimus ante tribunal Christi recepturi prout in corpore gessimus sive bonum fuerit sive malum eapropter nos oportet diem messionis extreme misericordie operibus prevenire ac eternorum intuitu seminare in terris quod reddente Domino cum multiplicato fructu recolligere debeamus in celis et licet omnibus misericordie opera passim inpendere teneamur viris tamen religiosis qui abnegantes salubriter semetipsos elegerunt in paupertate Christo pauperi ad placitum famulari habundancius viscera pietatis in operibus misericordie favore religionis suadente debemus aperire Hinc est quod Deo et ecclesie Beate Marie Glaston et Michaeli abbati et successoribus suis et eiusdem loci conventui ecclesiam de Uplym divini amoris intuitu cum omnibus eius pertinenciis dedimus in proprios usus in perpetuum possidendam ita quod per ipsum Michaelem pro discrecionis sue arbitrio adeo salubriter fructuum nostre largicionis in pios usus fiat conversio ut ecclesie Glaston benefactores fructuosas a Domino recipient remuneraciones et nostre gracie et eiusdem Michaelis prudentis ac salubris ipsorum temporalium disposicionis exemplo plurimorum ad ipsius ecclesie incrementa beneficiorum excitetur devocio salva tamen vicaria centum solidorum in eadem ecclesia per nos taxata et dictorum abbatis et conventus perpetua presentacione ad eandem cum vacaverit Vicarius vero qui pro tempore fuerit omnia onera ordinaria sustinebit extraordinariis inter ipsum et prefatos abbatem et conventum pro rata parciendis In cuius rei testimonium presenti scripto sigillum nostrum apponi fecimus Dat apud Chiddelegh[] anno gracie millesimo ccxxxviij mense Decembr xvij Kal Januar pontificatus nostri anno xv

Source Fulltext: Great Chartulary of Glastonbury. A. Watkin. Somerset Record Society, V.59. Somerset Record Society. Butler and Tanner. Frome. 1947.