Anno regni regis Henrici filii regis Iohannis quinquagesimo quarto ad festum omnium sanctorum eiusdem anni facta fuit hec convencio inter Gervasium de Kant ex una parte et Willelmum Lenveyse et Iohannam uxorem suam ex altera videlicet quod predictus Gervasius tradidit concessit et dimisit predictis Willelmo et Iohanne uxori sue pro triginta et quinque solidis sterlingorum quos eidem solverunt premanibus quatuor acras terre cum pertinentiis suis in marisco et in villa de Wenitone de feodo abbatis de Westmonasterio in campo qui vocatur Sherveslond iacentes in latitudine inter terram Roberti de Quercu et terram predicti Roberti extendentes eciam in longitudine versus partes orientales et occidentales a fovea predicti Roberti usque ad foveam que dicitur la Thrudich habend et tenend predictis Willelmo et Iohanne uxori sue et eorum heredibus vel cuicumque illas dare vendere vel assignare voluerint vel legare libere quiete integre bene et in pace usque ad finem septem annorum proximorum sequencium et completorum ita videlicet quod predictus Gervasius et heredes sui warantizabunt acquietabunt et defendent totam predictam terram cum pertinentiis predictis Willelmo et Iohanne et eorum heredibus et assignatis suis vel suis delegatis ut in redditibus sectis auxiliis querelis et omnibus secularibus demandis contra dominos feodi et omnes alios de dicta terra aliquid exigentes usque in finem predicti termini per predictam pecuniam sibi premanibus solutam Et si predictus Gervasius infra predictum terminum in fata decesserit ita quod predictam terram predictis Willelmo et Iohanne et eorum heredibus sive assignatis suis vel suis delegatis warantizare non poterit obligat se et concedit ut testimonium eius omnino interdicatur ita quod executores eius de catallis et bonis suis nullam optineant administracionem donec eisdem de catallis et bonis suis de termino suo tunc tempore futuro plenarie satisfactum fuerit et eciam predictus Gervasius et heredes sui invenient predictis Willelmo et Iohanne uxori sue et eorum heredibus et assignatis vel suis delegatis viam competentem ad dictam terram per quam possint ambulare fugare vectare et fructus dicte terre quicumque et quocumque voluerint asportare usque in finem predicti termini Item predictus Gervasius nec heredes sui infra predictum terminum predictam terram in parte nec in toto nulli vendent seu dimittent in feodum vel ad firmam nisi predictis Willelmo et Iohanne et eorum heredibus et assignatis vel delegatis prout eam aliquis racionabiliter comparare voluerit In fine vero predicti termini tota predicta terra cum pertinentiis suis predicto Gervasio sive heredibus suis sine calumpnia integre relinquatur In cuius rei testimonium predicti Gervasius et Willelmus huic scripto cirographato sigilla sua alternatim apposuerunt Hiis testibus Iohanne le Bret Roberto Gervays Roberto de Quercu Iohanne Marcien Iohanne Gasewey Simone le Herle Iohanne de Walla Iohanne le hanapere Iohanne le Yelde Ada Snelling Nicholao clerico huius scripti notario et aliis

Source Fulltext: Cartulary of the Knights of St. John of Jerusalem. M. Gervers. Records of Social and Economic History, New Series 23. British Academy. Oxford University Press. Oxford. 1996.