Omnibus Christi fidelibus presens scriptum visuris vel audituris Willelmus de Watevile miles filius et heres Iohannis de Watevile salutem in Domino sempiternam Noveritis me concessisse [et] de me et heredibus meis quietum clamasse priori et fratribus hospitalis sancti Iohannis Ierusalem in Anglia apud Mapeltrestede commorantibus totum ius et clameum quod habui vel aliquo modo habere potui in quatuor solidis annui redditus de quindecim acris terre cum pertinentiis de me tentis per servicium duodecim denariorum per annum in villa de Bumstede Helyun quem quidem redditum habuerunt de dono Iohannis patris mei quod quidem factum dicti Iohannis patris mei pro me et heredibus meis confirmo imperpetuum et ratifico ita quod nec ego nec heredes mei aliquis nomine nostro aliquid iuris vel clamei in predictis quatuor solidis annui redditus exigere de cetero vel vendicare poterimus Et ut hec mea concessio quieta clamacio et ratificacio et huius presentis scripti confirmacio rate et stabiles permaneant huic scripto sigillum meum apposui Datum apud Hamstede die sabatti proxima post festum nativitatis beate Marie virginis anno regni regis Edwardi vicesimo Hiis testibus domino Willelmo de Hanyngfelde milite Iohanne le boteler Gilberto Hakun Willelmo de Holmestede Iohanne fratre suo Nicholao le Surmyr Alano filio Galfridi Elia Norman Iohanne fratre suo et multis aliis

Source Fulltext: Cartulary of the Knights of St. John of Jerusalem. M. Gervers. Records of Social and Economic History, New Series 6. British Academy. Oxford University Press. Oxford. 1982.