Uniuersis Cristi fidelibus presentes litteras inspecturis frater W dictus prior omnium fratrum beate Marie de Carmelo in Anglia commorantium salutem et tam debitum quam deuotum cum orationum suffragiis famulatum Cum nobilis uir dominus N de Meules Iocum nobis Oxonie ad inhabitandum pro se suorumque salute iamdudum duxerit contulisse dilectum fratrem nostrum Iohannem de Ropha sacerdotem latorem presentium qui uice nostra locum eundem recipiat et inhabitet transmitto per obedientiam salutarem plenam etiam ei cum omnibus qui in eodem loco uel extra ius aliquod uendicauerint componendi et transigendi seu alias qualitercumque de eodem loco prout secundum dominum expedire uiderit disponendi tam in temporalibus quam in spiritualibus absque omni exceptione confero potestatem ratum habiturus et gratum quicquid ratione eiusdem loci cum quibusdam et coram quibusdam in forma et ad bonum ordinis fecerit de premissis uenerande insuper uniuersitati uestre supplico [humiliter] et deuote quatinus predicto fratri Iohanni et socio suo quemcunque sibi assotiauerit circa prefata negotia euntibus et redeuntibus quiescentibus et laborantibus subuenire non minus efficaciter quam meritorie studeatis et eisdem Cristi pauperibus propter eum et cum eo mendicantibus et omnino nichil proprium possidentibus necessaria uiatice sustentationis suffragia diuine pietatis intuitu porrigatis quoniam merces uestra copiosa est in celis cuius utinam effitiantur participes omnes benefici presentium executores Ualeat uniuersitas uestra semper in domino Dat apud Cantebrigiam anno gratie mccl sexto xii Cal Septembris

Source Fulltext: Cartulary of Oseney Abbey. H. E. Salter. Oxford Historical Society, V.90. Oxford Historical Society. Clarendon Press. Oxford. 1929.