Inquisitio facta Oxonie coram Radulfo de Werners die Mercurii proxima post diem Palmarum anno regni regis Edwardi xiv per breue domini regis sibi directum in hec uerba ut patet inferius Edwardus dei gracia rex Anglie dominus Hibernie et dux Aquitannie dilecto et fideli suo Radulfo de Werners salutem Sciatis quod assignauimus uos ad inquirendum per sacramentum proborum et legalium hominum de visn[eto] Oxonie per quos rei veritas melius sciri poterit quantum illa placea terre ex utraque parte pontis de la Hide que uocatur warra aque et que se extendit a domo monachorum loci Regalis Oxonie super ripam Tamisie versus molendinum nostrum Oxonie tam in longitudine quam in latitudine in se contineat et quantum valeat per annum in omnibus exitibus et quis modo et quo titulo eam teneat et utrum esset ad damnum nostrum aut aliorum si eandem placeam concedamus dilectis nobis in Cristo abbati et conuentui Regalis Loci Oxonie tenend in perpetuum necne et si esset ad damnum nostrum aut aliorum ad quod damnum nostrum et quod damnum aliorum et quorum et qualiter et quomodo et ideo uobis mandamus quod ad certum diem et locum quos ad hoc prouideritis inquisitionem illam facias et eam distincte et aperte factam sub sigillo vestro et sigillo eorum per quos facta fuerit nobis sine dilatione mittatis et hoc breue Mandauimus enim vicecomiti nostro Oxonie quod ad certum diem et locum quos ei scire facias venire faciat coram vobis tot et tales probos et legales homines de predicto uisn[eto] per quos rei veritas melius in premissis sciri poterit et inquiri In cuius rei testimonium has litteras nostras fieri fecimus patentes Teste meipso apud Westmonasterium sextodecimo die Februarii anno regni nostri xiv Inquisitio ergo inde facta est per sacramentum subscriptorum viz Henrici Oweyn Iohannis de Eu Radulfi le Plomer Andree de Pyrye Rogeri de Trillemulla Iohannis de Ardern Thome de Orleyns Henrici de Gamages Walteri Feteplace Ricardi Ouerhee Petri folii Iohannis et Euerardi Pistoris qui dicunt per sacramentum suum quod una pars predicte placee et warre ex parte boreali predicti pontis de la Hide continet viginti et unam perticam in longitudine et quatuor perticas et dimidiam in latitudine et non valet plus quam sustentatio warre inde reprendit et est pertinens ad molendinum domini regis Oxonie unde medietatem tenet domina regina mater predicti domini regis ex dimissione eiusdem domini regis et burgenses domini regis Oxonie tenent aliam medietatem in perpetuum pertinentem ad firmam uille sue Oxonie per cartam domini regis Iohannis Dicunt etiam quod si dominus rex illam partem placee et warre concedat predictis abbati et conuentui Loci Regalis Oxonie in perpetuum non esset ad damnum domini regis nec aliorum dum tamen predictam warram teneant clausam sine apertura et quod si ibidem ullam faciant aperturam esset ad damnum domini regis xx li per annum eo quod per eandem aperturam subtraheretur aqua que venire deberet ad predicta molendina domini regis Oxonie Item dicunt quod alia pars predicte placee et warre ex parte australi predicti pontis de la Hyde continet in longitudine xxviii perticas et latitudine duas perticas et dimidiam et ualet per annum x s et est pertinens ad predicta molendina domini regis Oxonie unde medietatem tenet predicta domina regina ex dimissione domini regis et predicti burgenses sui Oxonie tenent aliam medietatem in perpetuum pertinentem ad firmam ville sue Oxonie per cartam predicti domini regis Iohannis Item dicunt quod si dominus rex illam partem placee et warre concedat predictis abbati et conuentui in perpetuum et quod aliquo modo esset extra custodiam qua nunc est esset ad damnum domini regis in pratis suis xx li per annum et etiam ad damnum eiusdem domini regis in molendinis suis predictis Oxonie xx libras per annum eo quod custodes predictorum molendinorum et prati non possent tunc ad commodum et utilitatem domini regis et aliorum cum necesse fuerit predictam warram aperire et claudere cum inundatio et diminutio aque accidere contigerit Item dicunt quod esset ad damnum abbatis de Osney et omnium burgensium burgi et suburbii Oxonie mansionis fratrum predicatorum abbatisse de Godstowe et prioris sancte Frideswide c libras et ad damnum omnium tenentium prata et pasturas juxta Tamisiam de predictis molendinis domini regis Oxonie usque Kryklad cccc libras et amplius per annum quod dicti jurati nesciunt estimare In cuius rei testimonium predicti duodecim iurati huic inquisitioni sigilla sua apposuerunt

Source Fulltext: Cartulary of Oseney Abbey. H. E. Salter. Oxford Historical Society, V.90. Oxford Historical Society. Clarendon Press. Oxford. 1929.