Omnibus Christi fidelibus presens scriptum uisuris uel audituris G dei gracia abbas Egneshamie et eiusdem loci conuentus salutem eternam in domino Noueritis nos tradidisse et concessisse domino R priori de Minori Maluernia et eiusdem loci conuentui ad perpetuam firmam omnes decimas quas percipere consueuimus de dominico dictorum prioris et conuentus in uilla de Neuintone una cum decimis Simonis de Holeford et Warini Fullonis quas de dicto dominico tenent in eadem villa cum quibuscunque omnium predictorum pertinentiis sine aliquo retinemento in perpetuum soluendo inde annuatim coquinario nostro qui pro tempore fuerit xxv solidos duobus terminis anni uidelicet in Natiuitate sancti Iohannis Baptiste xii solidos vi d et in festo sancti Michaelis xii solidos vi d et si contingat quod dictam pecuniam dictis terminis uel infra viii dies proximo sequentes nobis uel certo nuncio nostro apud Newintone non soluerint teneantur nobis omni termino quo fuerit cessatum per conuencionem inter nos inhitam in duabus marcis rato manente pacto et omnibus expensis in lite faciendis et etiam ante litis contestacionem Et ad hec fideliter obseruanda subiecerunt se dicti prior et conuentus iurisdiccioni archidiaconi Gloucestrie qui pro tempore fuerit ad se compellendos per censuram ecclesiasticam omni appellacione et impetracione penitus remotis Et ad maiorem prescripte rei securitatem prefati prior et conuentus scriptum suum nobis inde fecerunt signum uniuersitatis sue una cum signo prioris eidem apponentes Et ut hec nostra tradicio et concessio rata et stabilis in perpetuum permaneat presenti scripto sigilla nostra apposuimus Data anno gracie m cc L tercio in uigilia Ascencionis

Source Fulltext: Cartulary of the Abbey of Eynsham. H. E. Salter. Oxfordshire Record Society, New Series V.49. Oxfordshire Record Society. Clarendon Press. Oxford. 1907.