Omnibus [etc] Gilbertus diuina permissione abbas Egneshamie et eiusdem loci conuentus salutem in domino Noueritis quod magister Walterus officialis archidiaconi Oxon[iensis] et executores testamenti Ade quondam archidiaconi Oxon[] dederunt nobis pratum in uilla de Estcote Sauceysham quod pratum emerunt de Radulfo de Saucey pro decem et octo marcis et preterea dederunt nobis quindecim marcas argenti de bonis dicti Ade cuius anime propicietur deus quod pratum et quas quindecim marcas dedimus Iohanni le Myre militi pro terra quam tenuit in manerio nostro de Parua Rollendriht de licencia dictorum executorum ita quod pro dicto prato et dictis denariis assignauimus dedimus et concessimus triginta solidos annuatim de bonis domus nostre ponendos pro anima dicti Ade in hunc modum uidelicet ad vnam pitanciam nostram die obitus sui annuatim viginti solidos et ad pascendum eodem die annuatim centum pauperes decem solidos Et si contingat quod vacante abbathia nostra uel aliquo alio casu aliquo modo subtrahatur quominus annuatim sic fiat nos statim cum poterimus postea tociens pascemus dictos centum pauperes et habebimus pitanciam predictam et celebrabimus exequias dicti Ade quociens id factum non fuerit Et vt ista nostra concessio in perpetuum firma sit et stabile tam nos omnes et singuli quam dictus officialis auctoritate sua ordinaria excommunicauimus omnes illos qui dictam concessionem et donacionem nostram infringent uel infringi procurabunt uel machinabuntur quominus perpetuam teneant firmitatem et omnes qui istam scripturam destruent maliciose uel de domo nostra amouebunt nos et successores ad premissa obligantes sub pena dicte excommunicacionis et diuine vltionis In huius autem rei testimonium parti huius scripti penes dictos executores residenti sigilla nostra apposuimus et prefati executores parti eiusdem scripti in modum cyrographi confecti penes nos residenti sigilla sua apposuerunt Datum apud Egnesham vii Idus Marcii anno gracie millesimo ccxlii

Source Fulltext: Cartulary of the Abbey of Eynsham. H. E. Salter. Oxfordshire Record Society, New Series V.49. Oxfordshire Record Society. Clarendon Press. Oxford. 1907.