Vniuersis [etc] frater Thomas abbas monasterii Egneshamie et eiusdem loci conuentus salutem in vero salutari Ad vniuersitatis vestre noticiam volumus peruenire quod cum nos et monasterium nostrum plures decimas tam maiores quam minores de manerio et dominicis terris uenerabilis patris domini Lincolniensis episcopi ac etiam de terris et possessionibus quorundam aliorum infra parochiam prebendalis ecclesie de Bannebyri necnon et in parochia de Cherlebyri cum suis capellis de Chadelyngtone et Schorthamtone hactenus pacifice possederimus et possideamus canonice in presenti attendentes ex quibusdam verisimilibus coniecturis quod super eisdem decimis uel earum aliquibus lis contra nos saltem de facto proximis retroactis temporibus fuisset suborta nisi prius pater dominus Oliuerus dei gracia Lincolniensis episcopus monasterii nostri patronus defensionis clipeo nobis in hac parte aduersari uolentibus restitisset quodque preteritorum exempla in consimilibus cauere nos admonent in futurum et affectionem sinceram quam dictus pater erga nostrum et suum peculiare monasterium predictum semper gessit et adhuc gerere comprobatur plenius aduertentes et sic de ipsius patris beniuolencia confidentes ad plenum quoad omnes decimas predictas quas infra dictam parochiam de Bannebyri optinemus et quoad ius ac possessionem omnimodam quod et quam habuimus habemus seu habere poterimus in eisdem necnon et ecclesiam predictam de Cherlebyri cum suis capellis antedictis que de nostro patronatu existit nos ac monasterium nostrum et ipsas decimas omnes ac predictam ecclesiam cum suis capellis dicti patris ordinacioni pure sponte et simpliciter submittimus per presentes ratum habituri et firmum quicquid dictus pater de premissis qualitercunque duxerit ordinandum In cuius rei testimonium sigillum nostrum commune presentibus est appensum Datum in capitulo nostro de Egnesham mense Iulii anno domini m cc nonagesimo tercio

Source Fulltext: Cartulary of the Abbey of Eynsham. H. E. Salter. Oxfordshire Record Society, New Series V.49. Oxfordshire Record Society. Clarendon Press. Oxford. 1907.