Ego Odo, archipresbiter Tullionis , omnibus notum facio presentibus et futuris quod Wiardus Goliarz veniens in presenciam meam guerpivit ecclesie et fratribus Fonteneti quicquid de terra illa calumpniabatur quam Willermus et Petrus frater ejus de Cirilli eidem ecclesie contulerant in elemosinam. Monachi vero ejusdem ecclesie assignaverunt Wiardo et concesserunt propter pacem illius habendam duo jugera terre subtus villam de Saigniaco tantummodo in vita sua possidenda que tamen post decessum illius ad monachos revertentur. Hoc totum laudavit Haudaarz uxor sua et promiserunt ambo pariter quod etiam Petro filio suo qui tunc in scolis Flaviniaci morabatur laudare facerent et tenere. Hoc etiam laudavit Galanz de Grinum et quittavit tam ipse quam uxor sua Agnes et filia ipsorum Helysabez jamdicte ecclesie quicquid juris in eadem terra se habere dicebant. Hujus rei testes sunt Bernardus abbas Fonteneti , Andreas de Buxi , Odo monachi Fonteneti, Oliverius de Grinun , Josbertus de Maisi , Pontius de Chaaci , Renerius de Rocha , Haymo Puta Pena milites, magister Henricus de Grinun . Quod ut totum ratum permaneat presenti pagine sigillum meum apponi precepi, anno verbi incarnati m° c° xc° ix°.