Ego, Odo, dux Burgundie , notum facio universis presentes litteras inspecturis quod cum inter abbatem et monachos Fonteneti ex una parte et nobilem virum Andream dominum Espissie ex altera controversia verteretur super hominibus, possessionibus et terris apud Marmaniam existentibus que nobilis mulier Hyla de Monte sancti Johannis et Johannes, filius ejusdem, in perpetuam helemosinam domui Fonteneti dederant et concesserant que etiam a bone memorie Bernardo, patre eidem Andree, abbas et monachi dicebant occupata fuisse et preterea super trecentis marcis argenti quas predicti abbas et monachi sibi a prefato Bernardo sepedicti Andree patre legatas fuisse asserebant. Tandem me presente et viris venerabilibus G. Eduensi , W. Lingonensi et W. Autissiodorensi episcopis et Guido de Donipetra et multis aliis in hanc compositionis formam venerunt quod de trecentis marcis superius nominatis abbas et monachi nominati medietatem habeant, reliquam vero medietatem Andreas supradictus. De rebus vero apud Marmaniam existentibus de quibus erat controversia, ita fuit statutum quod Guido, frater Andree, canonicus Lingonensis , res illas tenebit quamdiu vixerit et post mortem ipsius Guidonis ad ecclesiam Fonteneti libere et absque omni contradictione revertentur. Tenebit autem res illas Guido prefatus nomine ecclesie ab ecclesia Fonteneti. Actum anno dominice incarnationis millesimo cc° xiii° mense octobri.