Ego Willermus, Dei gratia Lingonensis episcopus, notum facio presentibus et futuris quod Andreas dominus Rubei Montis in procinctu super provinciales hereticos constitutus dedit et in perpetuam elemosinam concessit ecclesie Fonteneti pro remedio anime et antecessorum suorum per totam terram suam usum et aasentias in bosco et in plano et in aquis piscaturas et pasturas et in nemoribus pastiones et foagium et rameam et quicquid pastoribus et pecoribus in eisdem locis necesse fuerint, excepto quod si eorum animalia in pratis vel bladis dampnum fecerint sine alia emenda capitale totum restituent. Laudavit etiam idem A. omnes elemosinas a predecessoribus suis eidem ecclesie factas et elemosinam quam Hugo Curebois de quadam domo que est apud Rubeum Montem eidem ecclesie fecit et plateam que est juxta eamdem domum quam Guido de Anceio predicte ecclesie dedit. Item donavit predicte ecclesie Guidonem de Valchat cum heredibus et omnibus tenamentis suis et promist eumdem garantire et immunem ab omni questu et exactione.Concessit quoque eidem G. et heredibus ejus aasentiam in terra sua sicut et jamdictis fratribus. Hec autem omnia servare et tenere juramento interposito prefatus A. firmavit. Quod totum ut ratum habeatur sigilli nostri auctoritate roboravimus. Actum anno incarnati verbi m° cc° x°.