Ego Henricus comes Nivernensis et M. uxor mea comitissa, notum facimus universis presentem paginam inspecturis quod elemosinam quam Givardus Gola et Petrus filius ejus fecerant ecclesie et fratribus Fonteneti de omnibus que habebant in terris, in pratis, in censivis apud Saigniaco et in decimis Grinionis et Boniseti et in prato quodam quod a me sub censu tenebant — de quibus omnibus in prejudicium predicte ecclesie post mortem jamdictorum Givardi et Petri investieramus Petrum Letardum eo quod ad nos pertinere credebamus —, ad peticionem tandem supradictorum fratrum Fonteneti recognoscentes ipsam elemosinam bene et legitime factam concessimus eis perpetuo pacifice possidendam et investiri eos fecimus per manum supradicti Petri Letardi. Et ut hoc ratum permaneat imposterum presentem paginam sigilli nostri inpressione fecimus communiri. Actum est hoc anno gratie m° cc° x°.