In nomine sancte et indiuidue trinitatis. Ego Adalbertus dei gratia Frisingensis episcopus. Notum esse uolumus tam presentibus quam futuris Christi fidelibus quo pacto aduocaciam bonorum uostrorum que habemus tam nos quam nostri in Montanis, in episcopatu scilicet Brixinensi et in episcopatu Tridentino et in episcopatu Curiensi, concessimus Bertolto marchioni Ystrie et filio ipsius Dalmacie Cromacieque duci ea uidalicet conuencione et sacramento fidei in sacerdotales manus nostras firmato, ne alicui hominum de aduo(ca)cia illa aliquid vnquam inbeneficient et ne potestatem habeant edificandi castrum aliquid in eisdem bonis sine licencia siue mandato nostri uel successorum nostrorum, et ne officialem aliquem ibi habeant nisi secundum peticionem nostram (et successorum nostrorum, et si officialis ille qui sicut dictum est, ad peticionem nostram) ibi ordinatus fuerit, hominibus nostris uel aliorum in eadem aduocacia nimis grauis et iniuriosus esse ceperit et infra sex ebdomadas iniuriam quam intulisse dinoscitur, non emendauerit, ad peticionem nostam mutetur et alius quem nos petiuerimus, substituatur. Et vt hec rata et inconuulsa permaneant, hanc cartam inde conscribi et sigillis utrorumque nostrum iussimus insigniri cum testibus subnotatis quorum hec sunt nomina, Ch. sancti Andree prepositus, Ortwinus sancti Sixti prepositus apud Slirse, Ch. sancti Viti prepositus, Heinricus de Scheftelarn prepositus, Engelscalcus prepositus sancti Petri Noue celle, Heinricus et Gotfridus capellani, de laicis Uolmarus de Wikkershouen, Hainricus de Hergoltspach, Otto de Waldek, Megenhart de Hage, Haertwicus de Frisinga, Hainricus de Ahdorf, Fridericus de Wippenhusen, Altmannus camerarius, Eberhart de Tagolvinge, Wolfer de Holzhusen, iunior Eberhardus de Tagolvingen, item de ministerialibus marchionis Lazarius de Wolfranthusen(!), Gotfridus de Vnigen, Chuno de Schacslich, Vdalricus filius Lazarii, Otto de Pergen, Pernhart de Kirchaim, Arnolt et Albreht de Gollenhouen et alii quamplures fidedigni. Acta sunt hec anno dominice incarnacionis M.C.LXXX.II., regnante F. Romanorum imperatore feliciter amen.

Source Fulltext: ZAHN, Codex Diplomaticus (=FRA II/31, Wien 1870) S. 118-119