Ich Chalhoh von Eberstorf chamrer in Osterreiche vergihe vnd tvn chvnt allen den die disen prief lesent oder horent lesen, die nv lebent oder hernah chvnftich sint, daz Lebmanne dem Jvden ze Wienne vnd seiner havsvrowen vnd seinen chinden von mir verstanden sint die zehenten paide grozze vnd chlaine da ze Pilchdorf, da ze Wentlingen vnd da ze Perwolfstorf die lehen sint von vnserm herren pischolf Wernharten von Pazzawe, vnd der zehente paide grozzer vnd chlaine da ze Raeheleinstorf der lehen ist von vnserm herren herzogen Fridrichen von Osterreiche, die vorgenanten zehenten hat Lebman der Jvde vnd sein havsvrowe vnd seine chint mit mein Chalhohes gvtem willen vnd gvnst vnd aller meiner erben vnd meins herren hant herzogen Fridriches von Osterreiche verchavft meinem svne hern Rvdolfen umb drev hvndert phvnt Wienner phenninge der si reht vnd redlichen gewert sint, vnd haben avch wir, ich Chalhoh von Eberstorf vnd Lebman der Jvde vnd sein havsvrowe vnd seine chint vnserm herren herzogen Fridrichen den zehenten da ze Raeheleinstorf ledichlichen vnd vnbetwngenlichen avf gigeben (!), also beschaidenlichen daz er den selben zehenten da ze Raeheleinstorf verlihen hat meinem svne hern Rvdolfen ze rehtem lehen vnd seinen erben, vnd swanne daz ist daz unser herre pischolf Wernhart von Pazzawe her ze Wienne chvmt, so sol ich in die andern drei zehenten avf geben also beschaidenlichen, swanne daz ist, daz ich Chalhoh die vorgenanten vier zehenten wider chavffen wil, die sol mir mein svn her Rvdolf oder sein erben, ob er niht enist, an alle wider rede her wider ze chavffen geben bei ainem drittaile oder bei zwain tailen oder gar ieglich drittail vmb hvndert phunt Wienner phenninge. Iz sol avch der chavf geschehen an Vnser vrawen tage der Liehtmesse vnd zv dehainer zeit mer in dem iare, vnd waere daz, des got niht gebe, daz mein svn her Rvdolf vnd sein erben die vorgenanten zehenten vor ehafter not niht versparen mohten, so svln sie mit den selben zehenten allen iren fromen schaffen, als iz in wol chome vnd fvege zv allem dem reht als vor an diesem prieve geschriben stet vnd anders niht, vnd gib in dar vber disen prief ze ainem vrchvnde vnd ze ainem gezevge vnd ze ainer vestnvnge diser sache versigilten mit meinem insigil vnd mit hern Stephans insigil von Meyssawe vnd mit der dreier prveder insigil hern Hainriches, hern Chvnrades vnd hern Siboten von Potendorf vnd mit meins vetern insigel hern Marchartes von Mistelbach die diser sach gezevg sint, mit ir insigiln vnd ander frvme levte genvch. Diser prief ist geben ze Wienne do von Christes gebvrt waren ergangen drevzehen hvndert jar, in dem sibenten jare dar nah, des naehisten Svntages nah Vnser vrowentage der Liehtmesse.

Source Fulltext: ZAHN, Codex Diplomaticus (=FRA II/35, Wien 1871) S. 33-34