Ich Rentsch burgraf ze Movncz uergich vnd tv^on chvnt allen den die disen prief sehent oder hoerent lesen, daz ich vnd die Logatscher die her nach geschriben sint an disem prief, gewesen sein bei minem herren dem ersamen bischof Emchen von Frising in siner pverg ze Lok vnd haben vmb Meinharten vnd Gosdissen brveder, Dobroschen sven von Logatsch die in siner vanchnvesse waren, also getaedingt, daz die vorgenanten Meinhart vnd Gosdissa vmb ir vanchnvezze vnd vmb dev tat dev in wideruaren ist dacz Seyroch, lauterlichen vreunt sint worden fver sich saelben vnd fver ir vreunt vnd fver ir nachgepouren, daz si fvrpaz chain veintschaft, noch chainer lai tat haben svellen gein des vorgenanten herren leuten oder gu^ot swie si genant sein, oder gein sinem gotshus, des habent di vorgenanten Meinhart vnd Gosdisse hintz den hailigen gesworn vnd geluebde geben in des vorgenanten herren des ersamen bischofen Emchen hant vnd alle die her nach geschriben sint, habent auch des saelben gesworn vnd gelobt als die vorgenanten M. vnd G. Dar zv^o sint die verschriben Logatscher Sifrit, Mvltz, Debrost der alt vnd Dobrost der iung, Arnolt, Curman, Thomas, Juri, Mamola, Juri, Janes, Hertwich, Juri, Pegrina, Adam, Martin vnd Wetschegoy von Mavntz willig pverg worden vnd habent mit ir aide gelopt swa minem vorgenanten herren von Frising oder sinem gotshus an sinen leuten oder an sinem gu^ot dev voruerschriben gelvebde vnd aide zerbrochen wvrden mit chainer lay geuerde, daz danne die vorgenanten pvergen vnuerschaidenlichen also swas an ainem ab gieng, daz man auf dem andern haben sol, minem vorgenanten herren bischof Em. im vnd sinem gotshuse schvldich sind worden zwaier hundert march Aglaier pfenning ze geben danne in ainem manod fver die weil vnd si gemant werdent. Swa aber si des nicht taeten vnd soelhev gelvbde veberfveren, so svellen si trevlos, erlos vnd rehtlos sein vnd sol der vorgenant bischof Emch oder sein nachchom vf ir leib vnd ir gvet haben vnd gewaertich vnd geuaerich sin vntz im dev zwai hundert march als vor verschriben ist vnd sinem gotshus vollechlichen geuallen. Dar veber nach der vorgenanten pvrgen vnd Meinharts vnd Gosdissen willen vnd pet vber dev vorgenanten vnd verschriben taeding vnd gelubde gib ich disen prief mit minem hangenden insigel ze ainer staetigung vnd ze ainem waren vrchvnde aller ding dev voruerschriben sint vnd dev taedinch sind geschehen dacz Lok do von Christes gepverte ergangen waren drevzehen hundert iar, dar nach in dem sibenten iar, des naechsten Eritags vor santt Bartholomeus tag.

Source Fulltext: ZAHN, Codex Diplomaticus (=FRA II/35, Wien 1871) S. 40-41