In nomine domini amen. Nos Dietricus prepositus Gurnocensis, Jacobus prepositus sancti Bartholomei Frisaci, Arnoldus doctor decretorum ac canonicus sancti Mauricii Auguste arbitratores seu amicabiles compositores concorditer assumpti et electi a reuerendo in Christo patre domino Emchone venerabili episcopo ecclesie Frisingensis presentatore de consensu ecclesie sue pro se, ecclesia sua et omnibus successoribus suis et domino Emchone de Alzeya canonico ecclesie Frisingensis ipsius presentato ex parte vna et a reuerendo in Christo patre domino Wernhero venerabili episcopo ecclesie Lauentine presentatore de consensu ecclesie sue pro se, ecclesia sua et omnibus successoribus suis et domino Ottone de Sawrawe presentato eiusdem ex parte altera super lite et controuersia que iam dudum uentilata est et uertitur inter eos super ecclesia sancti Petri prope Welzz Salzburgensis dyocesis et iurepatronatus eiusdem quod sibi quilibet predictorum presentancium conpetere asserebat, et ipsi presentati ex presentacione eorundem ius sibi fore quesitum mutuo altercabant, visis, auditis. intellectis, examinatis et summo digito trutinatis (!) parcium iuribus deliberacione prehabita diligenti, pro bono pacis et concordie ex uirtute, robore et vigore conpromissi predicti, Christi nomine inuocato, in hiis scriptis concorditer et communiter ordinamus, laudamus, arbitramur, diffinimus, dicimus et precipimus, quod reuerendus in Christo pater dominus Wernherus venerabilis episcopus ecclesie Lauentine pro se, ecclesia sua et omnibus successoribus suis et dominus Otto de Sawrawe presentatus ab eodem reuerendo in Christo patri domino Emchoni venerabili episcopo Frisiensis (!) ecclesie et omnibus successoribus suis, nec non domino Emchoni de Alzaya canonico ecclesie memorate faciant finem, remissionem, quietacionem et reputacionem ac pactum de ulterius non petendo super lite et controuersia quam eisdem mouebant occasione ecclesie sancti Petri prope Welcz Salzburgensis dyocesis et iurispatronatus eiusdem, cum nullum ius eosdem et quemlibet eorum seu alterum ipsorum inuenerimus in eadem et eodem habuisse communiter uel diuisim, propter quod memoratum dominum nostrum reuerendum in Christo patrem dominum Emchonem venerabilem episcopum ecclesie Frisiensis (!), ecclesiam suam et omnes suos successores et dominum Emchonem de Alzaya canonicum eiusdem ecclesie ab impeticione reuerendi in Christo patris domini Wernheri venerabilis episcopi ecclesie Lauentine et omnium successorum suorum et ecclesie sue, nec non domini Ottonis de Sawrawe duximus absoluendos et absoluimus communiter et concorditer in hiis scriptis, eisdem reuerendo in Christo patri ac domino, domino Wernhero venerabili episcopo ecclesie Lauentine, ecclesie sue suisque successoribus et domino Ottoni de Sawrawe super premissis et quolibet premissorum perpetuum silencium inponentes. Insuper ex bono et equo laudamus et arbitramur, diffinimus, ordinamus et precipimus, quod reuerendus in Christo pater dominus Emcho venerabilis episcopus ecclesie Frisiensis, ecclesia sua uel successores ipsius reuerendo in Christo patri domino Wernhero venerabili episcopo ecclesie Lauentine, ecclesie sue uel successoribus suis ab hodie usque in annum ad recompensam iuris quod sibi et ecclesie sue in ecclesia sancti Petri prope Welcz et iurepatronatus credebat conpetere, et pro dampnis quocunque modo illatis seu quolibet alio interesse decem marcarum redditus in parrochia Redenteyn comparare uel emere teneantur, si quos forte venales infra anni spacium non inuenirent, decem marcarum reditus (!) de dominicalibus suis de consensu capituli sui sitos in predicta parrochia Redenteyn infra tempus predictum assignent eidem et ecclesie sue libere et quiete, sub ea condicione quod quando uoluerint, eosdem reditus per equiualentes recuperent vel per argentum semper pro marca redituum quinque marcas ponderati argenti ponderis Winnensis computando. Item precipimus et arbitramur quod predicti domini et patres dominus Emcho venerabilis episcopus Frisiensis et dominus Wernherus venerabilis episcopus ecclesie Lauentine procurabunt ab hinc usque ad proximum festum beati Michaelis, quod capitula eorum hanc pronunciacionem, laudum siue arbitrium approbent et sigillorum eorundem appensione muniant, roborent et confirment. Et hec omnia et singula volumus et precipimus inuiolabiliter fieri et obseruari sub pena in conpromisso apposita, videlicet quod pars non obseruans cadat a iure suo et hanc in singulis capitulis laudi et conpromissi, si contrafactum fuerit, uolumus conmitti, saluo et reseruato nobis arbitrio et potestate declarandi, interpretandi et corrigendi, vbicunque et quandocunque uisum fuerit expedire super predictis et quolibet predictorum. Actum apud sanctum Petrum prope Welz, anno domini M. CCC. septimo, IIII. kalend. Junii. Hanc igitur pronunciacionem, laudum seu diffinicionem sic prolatam ipsis partibus seu procuratoribus earundem presentibus intimamus, nec non omnibus qui sua crediderint interesse, in quorum omnium euidenciam nos Dietricus prepositus Gurnoczensis doctor utriusque iuris et Jacobus prepositus sancti Bartholomei Frisaci pro nobis et magistro Arnoldo predicto qui sigillo proprio caruit, sigilla nostra ex certa sciencia rogati per magistrum Arnoldum presentibus duximus appendenda. Actum loco, anno et die prenotatis.||
Nos Wernherus dei gracia episcopus ecclesie Lauentine pro nobis et ecclesia nostra et omnibus successoribus nostris et ego Otto de Sawrawe presentatus ipsius et Emcho de Alzaya procurator reuerendi in Christo patris et domini Emchonis venerabilis episcopi ecclesie Frisiensis procuratoris nomine pro ipso, ecclesia sua et omnibus successoribus suis ac pro me ipso ipsius presentato omnes et singuli ex certa sciencia profitemur in hiis scriptis, quod arbitratores seu amicabiles conpositores per nos assumpti seu electi in causa ecclesie sancti Petri prope Welz et iuris patronatus eiusdem, videlicet dominus Dietricus prepositus Gurnoczensis, Jacobus prepositus sancti Bartholomei Frisaci et magister Arnoldus de Augusta formam compromissi sibi per nos traditam in omnibus et per omnia legaliter et integraliter obseruarunt, quare ipsorum pronunciacionem prescriptam approbamus et ex certa sciencia (ipsi) consentimus et presentes sigillorum nostrorum munimine roboramus. Et ego Emcho de Alzaya procuratorio nomine quo supra, promitto quod reuerendus in Christo pater et dominus Emcho venerabilis episcopus ecclesie Frisiensis usque ad proximum festum sancti Mychaelis sigillum suum appendat presentibus in testimonium approbacionis et ratificacionis omnium premissorum. Actum anno, loco et die prenotatis.||
Nos Gerhardus prepositus, Gotfridus decanus totumque capitulum ecclesie Frisingensis premisse pronunciani, diffinicioni, arbitracioni et laudo ex certa sciencia consentimus, ipsam approbamus, ratificamus et collaudamus, sigillo nostri capituli presentes legittime roborantes in euidenciam omnium premissorum. Actum Frisinge, anno domini M. CCC. VII., IIII. idus Junii.||
Nos Vlricus prepositus et archidyaconus totumque capitulum ecclesie sancti Andree in (ualle) Lauentina premisse pronunciacioni, diffinicioni, arbitracioni et laudo ex certa sciencia consentimus, ipsam approbamus, ratificamus et collaudamus, sigillo nostri capituli presentes legitime roborantes in euidenciam omnium premissorum. Actum in sancto Andrea in (ualle) Lauentina, anno domini M. CCC. VII., V. kalend. Octobris¹.

Source Fulltext: ZAHN, Codex Diplomaticus (=FRA II/35, Wien 1871) S. 35-39