Nos Emcho dei gracia episcopus ecclesie Frisingensis omnibus ad quos presentes peruenerint, cupimus esse notum, quod cum dilecti in Christo . . . prepositus, . . . decanus totumque capitulum ecclesie nostre Frisingensis sua conquestione nobis demonstrassent, quod commendator et fratres hospitalis in Bozano Tridentine dyocesis pro commendatore et fratribus in Lengenmos eiusdem ordinis et dyocesis quos sue ecclesie subiectos asserunt, Chvnradum de Fontana, Nycolaum et Engelmannum eius fratres colonos possessionum sitarum in monte Perbyan plebis de Vilanders predicte dyocesis, que quidem possessiones ad dictam nostram ecclesiam pertinere dinoscuntur, coram discreto viro domino . . . abbate sancti Laurencii in Tridento qui se gerit pro iudice sedis apostolice delegato, traxissent in causam et petiuissent, iidem prepositus, decanus et capitulum, vt defensioni earundem suarum possessionum auctoritatem et consensum prestare dignaremur, nos non solum in defendendo sed etiam in agendo eisdem auctoritatem, voluntatem et consensum adhibuimus et presentibus adhibemus, ratum et gratum habituri quicquid per sepedictos prepositum, decanum et capitulum, substitutum vel substitutos ab eisdem fuerit ordinatum. In quorum testimonium presentes dedimus litteras nostri sigilli munimine consignatas. Datum in Lok, anno domini millesimo CCC., septimo in vigilia Natiuitatis domini.

Source Fulltext: ZAHN, Codex Diplomaticus (=FRA II/35, Wien 1871) S. 42-43