Ich Otte von Cincendorf vergihe vnd tu^on chvnt allen den die disen brief ansehent oder horent lesen, daz ich noch dehain min erbe dehaines rechten mvgen geiehen noch svln auf Fridreiches chint von Ochsenpach der vns mit aigenschaft angehoeret nver daz des selben Frideriches chint elliusampt an alle widerred den ersamen herren minen herren bischof Emchen von Frisingen, sin nachchomen vnd sin gotshause ledichlichen an gehoerent seit ir mueter ein Witzlispergerinne gewesen ist, die dem selben gotshause von Frisingen ie vnd ie zu^ogehoret habent, da von sol ich noch dehain min erbe dehain ansprache hinnefvr gen den selben Frideriches chinden nimmer mer gesu^ochen. Vnd daz furbaz dehain zweifel noch chrieg dar vmb auf mug gesten, gib ich disen brief versigelten mit minem insigel fvr mich vnd fvr alle min erben minem vorgeschriben herren von Frisingen vnd sinem gotshaus ze einem staeten vrchvnde. Der brief ist gebn ze Waidhouen do von Christes geburte warn drevzehen hvndert iar vnd dar nach in dem ahtoden iar, des Eritags vor sant Mathias tag des zwelfpoten, vnd ist da bi gewesen vnd sint auch geziuch die ersam herren graf Gerhart tv^omprobst ze Frisingen vnd her Emche von Altzeie probst ze Wertse, her Heinrich pfarrer ze Entzesdorf vnd her Hertwich Verweser ze Waidhouen, Marquart der Luehsnekker von Schonpuehel, Chvnrat der Proter, Wolfhart von Fribrechtsteten vnd Otte von Witzlinsperge vnd ander biderbe levte genuege.

Source Fulltext: ZAHN, Codex Diplomaticus (=FRA II/35, Wien 1871) S. 48-49