Wir Gotfrid Fluschart, Heinrich Choel, Witig, Pitrolf der Wienner, Chvnrat des Fluschartes aidem, Vlreich Snabel, Chvnrat des Chvchenmaisters svn, Vroewein Karle, Heinrich Schoenhals, Dietrich der Zechmaister, Herbort Nachrihter, Wernhart der Visscher, Hagen in dem Winchel, Otte der Altrihter vnd Chvnrat der Seinchnecht burger ze Waidhouen veriehen vnd tv^on chvnt allen den die disen brief an sehent oder hoerent lesen, daz wir mit rehter borgschaft alle vnverschaidenleiche gelobt habn vnd burgen worden sein vnsers vrevndes Imbringes des rihter hintz vnserm herren graven Gerharte dem ersamen tv^omprobst von Freisingen an vnsers herren des erbaern fvrsten bischof Emchen stat des selben gotshauses ze Freisingen vmb drev hvndert phvnt Wienner phenning vnd vmb zwelf schilling der er im mit rehter raitvng schvldich worden ist vnd der er in auch wern sol halbes tailes auf die naechsten Mittevasten vnd des andern tailes auf die Ostern zehant dar nach, vnd in den selben vristen wern von tag ze tag an gevaerd als er sin wol schvldich ist mit gv^oten triwen. Waer aber daz der selbe Imbrinch sich dar an vergaezze vnd niht auzrihte daz vorgenant gu^ot auf diu zil als er gehaizzen hat vnd vns ze borgen dar vmb versatzzet, so sein wir gebvnden nach dem gelubde vnser porgeschaft alle gmain ein ze varn dar nach vnd wir gemant werden in rehter laistvng ein ze varn, hie zu Waidhouen in ain hause da wir hin gevordert werden vnd dar auz niht niht (!) ze chomen vntz Imbrinch oder wir nach ie der vrist gewern vnsern herren von Frisingen sines gu^otes gantzlich vnd gar vnd sind dannoch dar vber gebvnden dem selben vnserm herren an gevaerd ab ze legen allen den schaden den er sines gutes nach ie der genanten vrist nimt an Juden oder an Christen. Vnd daz div vorgeschriben borgschaft von vns also staet beleibe vnd vollefuert werde vnserem herren von Frisingen, gebn wir disen brief verinsigelten dar vber mit hern Hertweigs vnsers pfarrer ze der vrist den wir dar vmb alle gebeten habn, insigel ze einem vrchvnd. Der brief ist gegebn vnd geschriben do von Christes geburt warn drevzehenhvndert jar vnd dar nach in dem ahtoden jar, an dem naechsten Svntag vor Vasnach.

Source Fulltext: ZAHN, Codex Diplomaticus (=FRA II/35, Wien 1871) S. 49-50