Ich Lienhart Frankv^oten svn vergih an disem brief vnd tvn chvnt allen den di in sehent oder hoerent lesen, daz ich minem lieben herrn herm Emchen dem ersam bischof ze Freising der mich von sinen besvnderen gnaden avz seiner vanchnvzze ledich lazzen hat, gehaizzen vnd gesworn han, daz ich wider in vnd wider sein goczhaus ze Freising vnd wider alle seine laevt vnd gu^ot nimmer nicht tv^on sol vntz an meinen tot vnd darvmb han ich meinem vorgenanten herren dem bischof vnd dem gotzhaus ze Freising vnuerscheidenleich ze porgen geseczt Frankv^oten meinen vater, Heinreichen den Leimtaschen minen sweher vnd Geyselprehten von Oberlaybach, also ob ich meinem vorgenanten herren dem bischof vnd seinen laevten oder seinem gu^ot, dez got niht enwelle, fvrbaz dheinen schaden tvn, den selben schaden sv^ollen im vnd seinem gotzhaus die vorgenanten drei porgen an allen schaden vnuerschaidenlich ab tv^on gaentzlich vnd gar in viertzehen tagen, vnd geschieht des niht in den selben vierczehen tagen so svellen di vorgenanten porgen alle drei, swenne si mit meines herrn des bischofs brief oder mit seines bvrchgraven oder mit seines schreibers ze Lok briefen gemont werden, ze hant ein varen ze Lok vnd svllen da laisten in rehter geiselscheft nach porgen gewonheit vnd svellen nimmer auz choemen vntz daz minen vorgenanten herren bischof Emchen ze Freising vnd sinem gotz. haus aller der schade abgelegt wirt der im von minen wegen geschehen ist. Ich vergih auch, daz ich aller der gv^ot vrivnt worden bin di dar an schuldich weren daz ich in meines vorgenanten herrn des bischofs ze Freising vanchnvezze gewesen bin. Vnd daz daz alles minem vorgenanten herren dem bischof vnd dem goczhaws ze Freising staet vnd vnzebrochen beleibe, dar veber gib ich im disen brief versigelten mit der vorgenanter dreier porgen insigeln di ich erbeten han daz si irew insigel an disen brief gelegt habent, wan ich aigens insigels niht enhan. Dar zv^o veriehen wir die vorgenanten drei porgen Heinrich der Leimtasche, Frankv^ot vnd Geyselpreht von Oberlaybaeh, daz wir vnverschaidenleichen in allem dem reht vnd gedinge als vor an disen brief begriffen vnd geschriben ist, porgen sein fuer den genanten Lienharten Frankv^oten svn hincz vnserm vorgenanten herrn bischof Emchen vnd dem gotzhaus ze Freising vnd an alles geva\erde mit gv^oten triwen allez daz gern geleisten wellen daz vor an disem brief begriffen vnd verschriben ist, vnd dar veber nach des vorgenanten Frankvtes svn bet haben wir disen brief verinsigelt mit vnsern insigeln. Der taidinge sint avch gezevge graf Gerhart der tv^omprobst ze Freising, her Wolfhart von Roehling chorherr ze Freising, maister Chvnrat chorherr ze Mospvrch, Johans vnd Fridrich des vorgenanten bischof Emchen von Freising schreiber chorherren dacz sand Andre ze Freising, herr Chvnrat der ritter bvrchgraf ze Lok vnd Nyclav von Stayn vnd Anvelt des vorgenanten bischof Emchen marschalch vnd ander erbaer lavet. Der brief ist gegeben vnd sint dev taidinch geschehen ze Lok da man zalt von Christes gebverte drevzehenhvndert iar, darnach in dem achtodem iar, an sand Thomastach vor Weihnahten.

Source Fulltext: ZAHN, Codex Diplomaticus (=FRA II/35, Wien 1871) S. 52-54