Wir Fritze vnd V^olreich di bru^oder von Savrowe vergehen offenleich an disem brif vnd tven chvnt allen den den diser brif furchvmt, di nv sint vnd noh werdent, daz wir mit aller vnser erben hant vnd gu^oten willen den erbaeren vnde gaistleichen vrowen swester Diemv^oten der aptessinne vnd der samenvnge des conuentes der swester vnd der vrowen sande Chlaren ordens in dem havsse vnd in dem chloster bei Judenburch gelegen an der Mu^ore ze vnser swester Levkarten, di si ze in enphangen habent, got vnd vnser vrowen sande Marein ze lob, ze eren vnd ze dinst geben, geantwertet vnd avfgeben haben vnuersprochenleichen ebichleich ze besiezen vier march geltes, der ist ein hu^obe gelegen bi der Chetse ze Veustritz in dem dorf vnd ein hu^obe bei Weltz an der Cucrelle vnd datz Linte ein halb phvnt geltes vnd ein march geltes ze Lvbgast an dem perge, vnd haben in daz selbe gu^ot geben vnd geantw^ertet, gesu^ocht vnd vngesu^ocht, gebowen vnd vngebowen, mit holtze, mit wayde vnd mit allem dem rechte daz dar zv^o gehoert vnd alz wir iz her braht haben, vnd sulen wir vnd vnser erben der samenvnge vnd dem conuent der vrowen des selben havses daz gu^ot daz oben genant ist, getrewleich vnd an alle arge liste scherm vnd zer ledigen vor aller ansprach als aygens reht vnd als das lant ze Steyer in gewonhait herbracht hat. Daz daz stete vnd vnzebrochen vnd ewich beleibe von vns vnd vnsern erben, geben wir in darvber ze einem offen vrchvnde vnd ze gezevge der warheit disen offen brif mit vnser beider hangenden insigeln. Dar vber sint des gezevch her Herbot von Pfaffendorf, Oertel der Cholbe, Herbot vnd Fritze die bru^oder von Lobnich, Hainrich von Stretwich, Philippe der Wayse, Jacob der richter ze Judenbu^orch vnd ander erber leut. Daz ist geschehen ze Judenbu^orch nach Christes gebu^ort tavsent iar drevhvndert iar vnd dar nach in dem nevnten iare, an der heiligen martrer tage Johannis vnd Pavli.

Source Fulltext: ZAHN, Codex Diplomaticus (=FRA II/35, Wien 1871) S. 54-55