Ich Jacob von Gemvend schreiber mines herren grafen Albrehts von Goercz vergihe mit disem brief vnd tv^on chunt allen den die in sehent oder hoerent lesen, daz mir mein genaediger herre der ersam bischof Chu^onrat von Freisingen den zehenten ze Trahouen der sein vnd seins gotshaus ist, lazzen vnd verlihen hat ze mein eines leibe mit allen dem rehten die dar zv^o geho^erent, besu^oht vnd vnbesu^oht, mit der bescheidenheit daz ich den selben zehenten mein lebtag haben vnd niezzen sol vnd sol im vnd sinen nah chomen da von dienen vnd ze zins geben alle jar an sant Merteins tag aht vnd zweinczich march Agleyer pfenning an allen chriech vnd an alle wider rede vnd sol daz dhein geschiht niht irren, vnd den selben zins sol ich im oder sinen amptman ze Inchingen geben vnd antwurten iaerchleich auf die vorgenanten frist an allen sinen schaden. Swelhes iares des niht geschaehe, so bin ich zehant geuallen von minen rehten dev ich het an dem zehenten, vnd ist minen vorgenanten herren dem bischof vnd sinem gotshaus der vorgeschriben zehent aller dinge wider ledich vnd bin im dannoch schuldich des zinses von dem selbe iare gar vnd gentzleich, swes ich in oder sein amptlaevt niht gewert han. Vnd daz er des selbn zinses gewert werde, han ich im ze porgen gesetzzet vnuerscheidenleichen Friderichen den alten rihter von Puehel, Petern den Chuchenmeister vnd Jacoben Haegenlein den rihter ze Silian die minem vorgenantem herren dem bischof dar vmb geheizzen vnd gelobt habent, vnd swenn der vorgenanten porgen einer niht waer, so sol er ez auf den andern zwein porgen haben. Vnd wir graf Albreht von Goercz veriehen daz wir vnser insigel nah des vorgenanten Jacobs vnsers Schreibers bet an disen brief haben gehenget der gegeben ist ze Sylian, anno domini millesimo CCC. XVII., des Eritags in der Pfingstwochen.

Source Fulltext: ZAHN, Codex Diplomaticus (=FRA II/35, Wien 1871) S. 98-99