Wir Haug vnd Ru^odolf von Scharpfenberch tu^on chunt allen den die disen brief ansehent oder hoernt lesen, vnd veriehen offenlich an disem selben brief, daz wir baid gar vnd gaenczlich beriht sin vmb allen den schaden vnd vorderung die wir hatten vnd gehaben mohten, ez waer hauptgu^ot oder schade, gen dem erwirdigem herren bischof Chu^onrat ze Frisingen vnd gen sinem gotshause, daz wir dez schaden vnd der vorderung mit im vnd sinem gotshause beriht sin lieplich vnd guetlich vmb sehczig vnd hundert march Aglayer pfenning swaz wir schaden vnd vorderung hatten gen im vnd sinem gotshause ze Frisingen vncz vf disen hevtichen tach, vnd verzihen vns alles des rehten daz wir gen im vnd sinem goczhause hatten vnd gehaben mohten von des genanten schaden vnd vorderung wegen, haben aber wir dehain vordrung an daz gotshaus ze Frisingen vmb aigen oder vmb lehen oder vmb levt, der vordrung verczihen wir vns niht an disem brief, aller andrer vordrung, ez si schade oder ansprach oder gu^ot, des haben wir vns allez verczigen gaenczlich vnd gar. Vnd daz daz also staet vnd vnczerbrochen belibe, so geben wir im vnd sinem gotshause disen brief besigelten mit vnsern baider hangenten insigeln, der wart geben ze Waidhouen do man zalt von gots geburte druiczehenhundert jar, darnach in dem sehs vnd zwainczigostem jar, an dem Ergtag nach sant Matheus tach des zwelfboten.

Source Fulltext: ZAHN, Codex Diplomaticus (=FRA II/35, Wien 1871) S. 154-155