Wir Chünrat von gots gnaden bischof ze Frisingen veriehen offenlich an disem brief, swenn herr Reinpreht von Eberstorf vnser vnd vnsers gotshus vest ze Enczesdorf geantwurt vnd ingit hern Hainrich ald hern Friderich ald hern Reinpreht von Walse ald ir gewizzen boten ald ir ainem vnder den drin gebru^odern, swenn er daz getu^ot vmb die vorgenanten vest ze Enczestorf geantwurt vnd in git; so sagen wir in ledig aller der gelubde die er vns vnd vnserm gotshaus hat getan vmb die vor geschribenn vest ze Enczestorf, vnd ze ainem vrchund geben wir disen brief besigelt mit vnserm hangentem insigel der ist geben ze Graetz do man zalt von gots geburt druczehenhundert iar, darnach in dem siben vnd zwainczigisten iar, an dem naehsten Maentag vor Vnser frowen tach ze der Liehtmesse.

Source Fulltext: ZAHN, Codex Diplomaticus (=FRA II/35, Wien 1871) S. 156