Ch. dei gracia Frisingensis ecclesie episcopus. Honorabilibus in Christo canonicis de capitulo ecclesie Inticensis Brixinensis dyocesis amicis suis dilectis salutem et sinceram in domino caritatem. Recepta legacione peticionis vestre nobis exhibite per honorabilem virum dominum Marquardum ecclesie vestre decanum, videlicet de applicacione capelle ville Inticensis mense vestre et de quatuor ecclesiis parrochialibus; videlicet Sylian, Intica, Toblaco et Niderndorf conferendis tantummodo canonicis predicte ecclesie Inticensis, necnon de domo nostra episcopali in Intica vnienda et applicanda vobis et vestris vsibus, scire vos cupimus quod premissa omnia et singula ad nutum vestrum expedienda et peragenda nos habebitis satis beniuolos loco et tempore oportunis, et quia premissa preter consensum capituli nostri ac consensum venerabilis domini episcopi et capituli Brixinensis bono modo consummari non poterunt, oportet vt super hiis primitus requirantur. Verum constare vobis credimus quod nondum venimus nec venire potuimus ad sedem nostram, ad quam cum primo deuenerimus, consensum capituli nostri requirere intendimus super predictis vestris peticionibus et si deo placuerit obtinere effectumque peticionum vestrarum in quantum debemus et possumus adimplere, ita tamen quod semper sit salua domus supradicta inhabitacioni episcopi Frisingensis et suorum familiarium quamdiu in loco moram duxerit faciendam, contradictione qualibet non obstante. Ad hec volumus et hanc specialem graciam vobis facimus, vt si retardante forte accessu nostro ad sedem nostram medio tempore consensum predicti capituli nostri obtinere poteritis, parati esse volumus peticionem vestram super predictis tribus articulis ad votum vestrum liberaliter adimplere. Datum Waidehouen, die Jouis infra octauam Assumpcionis beate Marie virginis gloriose.

Source Fulltext: ZAHN, Codex Diplomaticus (=FRA II/35, Wien 1871) S. 161