Ich Otte vnd Friderich brueder von Luehsenek veriehen offenlich an disem brief vnd tv^on chunt allen den di in sehent oder hoernt lesen, daz wir habn gebn vnd verchavfet reht vnd redlich alles daz gu^ot daz wir ze Pergarn hetten ze lehen von dem gotshus ze Frising, vmb ains vnd dreizzich phunt Wienner phenning vnserm erwirdigen herren bischof Chu^onraden vnd sinem gotshus ze Frising, der selben ains vnd dreizzich phunt wir gar vnd gaenczlich gewert sein von vnserm herren bischof Chu^onrat vnd seinem gotshus ze Freising. Wir veriehen ovch, daz wir die gueter ze Pergarn auf habn gebn vnserm vorgnanten herren bischof Chu^onraden vnd seinem gotshus vnd wir mit den selben guetern niht me ze schaffen habn. Dev selben gueter geltent iaerchlich virezik meczen chorn vnd virczich meczen habern vnd zwo gens vnd sehs huenr. Bey disem chauf ist gewesen her Emch von Alczey probst ze Werdse, her Alram von Reicherstorf vnd Marquart der Luehsneker vnser vetter vnd Jacob der Speiser von Waidhouen vnd Ott der amman ze Waidhouen vnd Bernhart der chastner von Vdmaruelt vnd Ru^otlieb von Engelhaeming vnd ander erber levt vil, vnd ze ainem vrchuend dises chaufes gebn wir disen brief besigelten mit vnser baider insigel. Ich Alram von Reicherstorf vnd ich Marquard von Luehsnek veriehen, daz wir bey disem chauf sein gewesen vnd durch bet Otten vnd Friedrichs des Luehsneker so henken wir vnserev insigel an disen brief ze ainem vrkvnde dises chovfes. Diser brief wart geben ze Waidhouen do man zalt von Christes geburt drevzehnhundert iar vnd dar nah in dem syben vnd zwainczigsten iar, des Svntags vor sant Johans tag ze Sunewend.

Source Fulltext: ZAHN, Codex Diplomaticus (=FRA II/35, Wien 1871) S. 159-160