Ich Chu^onrad der Hu^ober vnd Brid mein hausvrowe veriehen offenlich an disem brief, daz wir habn ze chauffen gebn vnser lehen daz da haizzet an dem Raeklins lehen, vnserm gnaedigen herren dem erwirdigen bischof Chunrat ze Frising vnd sinem gotshuse vmb fumftzehen pfunt Wienner pfenning vnd sin der selben fumftzehen pfunt gar vnd gaentzlich gewert von im vnd von sinem gotshuse vnd habn im vnd sinem gotshuse daz selb lehen vf gebn vnd habn vns dar an vertzigen aller rehte. Daz vorgenante lehen ich Chunrat der Hu^ober halbez chaufte von Albrechten von Fridbresteten, daz ander tail des lehens gab mir mein swiger zv^o miner hausvrowen Briden ir tochter, dev baidev tail des lehens habn wir im vnd sinem gotshuse ze chauffen gebn vnd habn vns sin verezigen als vor geschriben stat. Daz vnserm vorgenanten herren bischof Chunrat ze Frising vnd sinem gotshuse daz also staet belibe vnd vnezebrochen, gebn wir im disen brief besigelten mit hern Marcharts insigel von Luechsenekke, mit hern Wernharts insigel von Schaffen velt (!), mit Chunrats insigel des Praters vnd mit Hermans insigel des Haevsibs. Ich Marchart von Luechsenekke, Wernhart von Schaffenuelt, Chunrat der Prater, Herman der Haewsib veriehen, daz wir durch pet Chu^onrats des Hu^obers vnd siner hausvrowen vrowen Briden disen brief habn versigelt mit vntsern insigeln zv^o einem vrchunde der worhait. Der brief is gebn ze Waidehouen, do von Christes gebuertte worn drevtzehen hundert jar vnd dar nach in dem newn vnd zwainczkisten iar, an Vnser vrowen tag in der Vasten der da haizzet Annunciacio.

Source Fulltext: ZAHN, Codex Diplomaticus (=FRA II/35, Wien 1871) S. 173-174