Ich Salmon von Gaizstechen verich offenleich an disem brief vnd tuen chunt allen den die in an sechent, lesent oder horent lesen, daz ich mit guetem willen vnd nach rat verchauft han meinem genedigen herren bischof Chu^onrat von Freising vnd seinem gotshaus ze Freising sechs schiling gelts newer Wiener pfhenig alle jar ze dienen von meinem hof ze Gaizstechen auf Vnser frawen tag in dem herbst als ander sein vrbar dient, vm zechen pfhunt pfhenig der ich Salmon gar vnd ganczleich gewert pin mit peraiten pfhenig von dem vor gescriben meinem herren bischof Chunrat von Freising. Ez ist auch tedingt vm die vor gescriben zechen pfhunt pfenig, vnd swen ich oder mein erben die sechs schiling gelts wellen (wi)der chaufen, daz sol geschen auf sant Georgen tag, vnd swen ich oder mein erben, daz tuen, so ist mein vor gescriben hof ze Gaizstechen ledich gar vnd gantzleich vm die sechs schiling gelts als vor gescriben stat. Vnd dar veber ze einem vrchuend vnd ze einer steten sicherhait so gib ich Salmon disen brief versidelt mit her Walters insidel von Chunratshaim vnd mit Hermans des Haeusibs insidel vnd mit Chu^onrat des Praters insidel vnd mit Chu^enrats von Puechawe insidel, wan ich selb aigens insidels nicht han. Ich her Walter von Chunratshaim vnd ich Herman der Haeusib vnd ich Ch. der Prater vnd ich Ch. von Puechawe verichen alle sant offenleich, daz wir durch Salmons pet vnserev insidel haben gehencht an disen brief vnd daz wir pei dem chauff gewessen sein vnd pei allen den teding di vor gescriben stent, vnd ist der chauf gesehen ze Waidhouen vnd der brief geben do man zalt von Christes gepurt driüzechen hundert jar vnd dar nach in dem newn vnd zwainzigistem jar, an sant Mathias tag des zwelfpoten.

Source Fulltext: ZAHN, Codex Diplomaticus (=FRA II/35, Wien 1871) S. 172-173