Allen den die disen brief an sehent oder hoerent lesen, chuenn ich Pernhart der Gesenczer richter ze Amsteten vnd ich Chvenrat sein brueder vnd vergihe offenlich an disem brief, daz wir dem erwirdigem herren byschof Chuenrat von Freysing vnd seinem goczhaus haben verchauft vnd ze chauffen geben vnsern sedel vnd vnser veste ze Peytenstain mit allem dem recht vnd geding als wirs her Chuenraten dem purchgrafen von Seuesenek heten geben, mit dem pawehof der zu^o der veste vnd zue dem sedel gehoert vnd von alter gehoert hat, die vnser payder recht aygen sint dev wir im auch vnd seinem goczhaus haben geben fuer recht aygen, vnd schullen dez auch sein vnd sein goczhaus gewern sein fuer aygen an allen steten da er vnd sein goczhaus sein noetuerftig sint, vnd schullen ims vnd seinem goczhaus schirmen fuer recht aygen daz haus ze Peytenstain vnd den pawehof vnd swaz dar zue gehoert vnd von alter gehoert hat von holcze, von velde, von wismad vnd von wayde, mit wazzer vnd mit wazzerfluezzen, besuecht vnd vnbesuecht, als ez dem purchgrafen von Seusenek ward auz gezaigt enhalbe dez pachez in dem selb geding vnd chauf, als wirs dem purchgrafen heten hin lassen vnd geben, also haben auch wirs vnserm herren byschof Chuenrat von Freysing vnd seinem goczhaus geben vmb zwainczig vnd drevhundert pfvnt Wienner pfenning, also heten auch wirs dem purchgrafen geben vnd verchauft vnd nicht anders. Nu geit vns vnser herr der byschof von Freysing dreisig pfunt mer, di selben dreisig pfunt hat er vnd sein goczhaus vns iezunt gar vnd gaenczlich gewert mit beraiten pfenning. So schol er vns geben vor sant Goergen tag der nv schirst chumt, hundert pfunt dar vmb er vns hat puergen geben vnd verseczt, dar nach schol er vns geben auf den naechsten sant Johans tag zwainczig pfunt. Swenn er vns auch der zwainczig vnd hundert pfunt gewert, so sint die puergen ledig von vns di er vns dar vmb het geben vnd verseczt. Dar nach schol er vns geben auf den naechsten sant Marteins tag oder in vierczehen tagen nach sant Marteins tag zway hundert pfunt pfenning, vnd swo er oder sein goczhaus oder sein nach chomen ob er enwaer, vns nicht werte der zwayer hundert pfunt ze sant Marteins tag oder in vierczehen tagen dar nach, swaz er vns denn pfenning vor hat geben oder gewert an den vierdhalb hundert pfunden, die schullen alle ab sein vnd verlorn vnd schullen wir mit vnsrer puerge vnd mit vnserm hof vnser dinch schaffen swaz wir wellen. Swo aber er oder sein goczhaus, ob er enwaer, vns der zwayer hundert pfunt weret als vor geschriben stat, so schullen wir im oder seinem goczhaus, ob er enwaer, die veste ze Peytenstain vnd den pawehof antwurten vnd in geben an allen fuerzug vnd widerred vnd haben daz gesworen zden haligen (!). Wir haben auch alle drey gesworen zden haligen, ich vnd Chuenrat vnd Haug mein brueder, allez daz ze tuen vnd zefolfueren als hin nach geschriben stat, an alle fuerzug vnd widerred. Swenn wir der zwayer hundert pfunt gewert werden, so schullen wir, ich vnd Chuenrat mein brueder, vnserm herren von Freysing vnd seinem goczhaus alle die brief geben versigelt mit vnsrer payder insigel vnd mit andrer vnsrer brueder insigel aller der er vnd sein goczhaus durfen vnd noetuerftig sint, vber die veste ze Peytenstain vnd vber den pawehof vnd swaz dar zue gehoert vnd von alter gehoert hat, besuechcz vnd vnbesuechcz. Ander venser brueder schullen sich auch an dem brief verczeihen aller der recht die si hant oder gehaben muegen an der veste ze Peytenstain vnd an dem pawehof vnd swaz dar zue gehoert oder von alter gehoert hat. Wir schullen auch die werschaft enpfahen ze Amsteten in dem marchte an geuaerd vnd an alle widerred ze allen zilen. Wir schullen auch ze ie dem zil vnser gagen brief geben vmb die werschaft swaz man vns denn wert. Ich Chuenrat der Gesenczer vergich auch offenlich an disem brief, daz ich vnd mein herr byschof Chuenrat von Freysing vber ain chomen sein vmb mein hueb die da haisset an dem Chirchweg, vnd swaz zue der hueb gehoert vnd von alter dar zue gehoert hat, besuecht vnd vnbesuecht, daz haben wir paidenthalben geseczet auf hern Marquard von Luechsenekk ritter vnd auf Pernhart meinen brueder, richter ze Amsteten, vnd auf Herman den Haewsib, vnd swaz mir die dar vmb haissent geben meinen herren von Freysing, dez schol mich genuegen vnd schol mich der selben pfenning weren vierczehen tag nach sant Marteins tag der nu schirst chumt, vnd hoerent mich die pfenning alain an, an meinen brueder Pernharten vnd schol ich die werschaft vnd die pfenning nemen ze Amsteten an geuaerd vnd han im auch die hueb fuer aygen geben vnd schol auch der hueb sein vnd seins goczhaus gwer sein an aller stat swo er sein bedarf, vnd schirm fuer aygen nach recht. Daz wir dez allez gepunden sein zetuen vnd zeuolfueren vnd zelaisten als vor geschriben stet an disem brief vnserm vorgenantem herren byschof Chuenrat von Freysing vnd seinem goczhaus, dar vmb geben wir im disen brief ze ainem vrchunde versigelt mit vnsrer payder insigel vnd mit Haugen vnsers brueder insigel. Der brief ist geben ze Waydhouen, do man zalt von Christez gepurt dreuczehenhundert iar vnd dar nach in dem dreisigistem iar, an dem naechsten Maentag nach dem Ostertag.

Source Fulltext: ZAHN, Codex Diplomaticus (=FRA II/35, Wien 1871) S. 177-180