Ich Welfinch von Randek vergich mit disem brief fuer mich vnd fuer min erben vnd tu^on chunt allen den die in sehent oder hoerent lesen, daz ich reht vnd redlich verchauft han vnd gebn meinem lieben herren dem ersamen bischof ze Freising vnd seinem gotshaus dev gu^ot dev her nach geschriben sint, dev ich in rehter lehens gewer von im vnd von dem gotshaus ze Freising vor her gehabt han, zway lehen an dem Hof dev geltent baeidev vierczehen schilling Wienner pfenning auf sant Georin tach vnd auf sant Michels tag, zway lehen in der Sliffach geltent bedev sechs schilling auf di selben frist, aein lehen in dem Wiczleinspache giltet ein phunt, vnd swaz chlaeins dienstes von den guetern gehoert, dev selben vorgeschriben gu^ot vnd lehen mit allem dem daz dar zue gehoert, besuecht vnd vnbesuecht, swie ez dar zu^o gehoert, han ich im vnd seinem gotshaus verchauft vnd gebn vmb drizzich phunt alter Wienner phenning der ich gaenczlich beriht vnd gewert bin vnd sol er vnd sein gotshaus dev vorgeschriben gu^ot habn vnd niezzen als ander sein vrbar vnd sein lauet. Doch hat mir mein herre dev besundern gnade getan, daz ich vnd min erben gewalt vnd reht habn suellen dev selben gu^ot wider ze chouffen von sand Jacobs tach der nu schierst chumt, inner drein iarn vmb dev vorgeschriben dreizzich phunt, wider chauffen wier aber nicht in der selben frist, so sullen dev vorgenanten gu^ot des bischofs vnd des gotshaus aigenlich vnd ewichlichen sin vnd sol ich noch dhaein min erbe fuerbaz nimmer mer chaein ansprache dar nach habn noch gewinnen. Vnd dar vmb ze einem vrchuende gib ich im disen brief versigelt mit minem hangendem insigel vnd ze einer vollern geworhait vnd vrchunde han ich gebetn hern Ru^odolf vnd hern Seifrit die Zinczendorfer, daz si irev insigel zu^o dem minem habent gelegt an den brief. Der brief ist gebn do man zalt von Christes geburtt dreuczehen hundert jar vnd dar nach in dem driezzigisten jar, an sant Veits tag.

Source Fulltext: ZAHN, Codex Diplomaticus (=FRA II/35, Wien 1871) S. 183-184