Ich Wolfger vnd ich Hainreich, hern Wolfgeres svn des wirtes ze Wograin veriehn fur vns vnd fur vnser geswistreid vnd vnser erbn ze Wograin des houes, daz wir auz den owen vnd auz den werden ze Holnburch niht mer holtzes nemen vnd vodern schullen dann zv drin lehen gehoret, wann vns daz der vorster mit der gemain geit des schol vns genugen vnd dhainen chrig da von machen vnd schullen allen vnser herren leuten vnd ir gu^et vnschadhaft sein, daz gehaizzen mit vnsern trevn. Wir veriehn auch, swann vns vnser herr von Frising vmb ainen dienst vodert oder sein pfleger iner acht jaren, daz im vnser ainer dann berait wesn zu dienen mit harnasch in dem land ze Osterrich an all widerred vnd gebn im des disen brif versigten (!) mit vnsern insigeln. Der brif ist gegebn ze Holnburch, do man von Christes gepurd zalt dreuzehn hvndert iar, dar nah in dem dreizkistem iar, an dem heiligen Pfingest tag.

Source Fulltext: ZAHN, Codex Diplomaticus (=FRA II/35, Wien 1871) S. 182