Chunt sei getan allen Christen leuten die nu sint oder noch chumftich werdent, die disen prief sehent oder hoerent lesen, daz ich Johans Berchtolden des Cholweken sun han gehabt ain chriech vnd ain ansprach hinz meim ohaim Andren Hainrichen sun von Haberberch vmb erbtail von vater vnd von mu^oter gu^ot. Der chriech vnd auch die selbe ansprache ist gar vnd genzleich vmb alle erbschaft vnd vmb alle chriege verricht die wir mit einander gehapt haben mit meins lieben vater Berchtolden des Cholbeken hant vnd mit seim gu^eten gunst vnd mit seim willen vnd mit seim worte vnd ander vnser gu^eten freunt vnd herren rat, also daz ich vnd mein oheim Andre mit enander getailt haben zwen hofe die gelegen sint ze Niderndorf an dem perge, ainer haizzet der Tater vnd ainer der Vnderstainer, vnd daz zins gut ze Inichingen daz lehen sint von dem gotshause von Freisingen, daz ain gilt zwen vnd funfzich pfenning, daz ander ain pfunt Perner, vnd ain wise gelegen in dem Sechsten, vnd sol ich Johans noch chain mein erben ewechleich chain ansprache nicht habn vmb chain erbschaft hincz Andren, noch hincz chain seim erben, vmb vater noch vmb mu^oter gu^ot, noch vmb chainr laye sache wan swaz mit rechten toden an erbschaft mochte auf mich geuallen nach landes recht. Ez ist auch ze wizzen, ob daz geschehe des got nicht enwelle, daz ich vorgenant Perchtolt der Cholbeke oder ich vorgenanter Johans sein sun ane leipleich erben sturben, ich Perchtolt vor meinem sune oder ich Johans vor meinem vater, so schaffen wir vnd wellen doch, daz Andre vnd sein erben, sune vnd tochter vnser rechte erben sein vber allez vnser gu^ot daz recht erben sullent oder mugent erben, vnd also vergihe ich Andre, ob daz auch geschehe daz ich an leipleich erben verdurbe des mich got vberheue, daz denne der vorgenant Perchtolt der Cholbeke vnd Johans sein sun vnd ir erben, sune vnd tochter, mein recht erben sein vber allez mein gu^ot, also rechte erben erben sullent oder mugent. Vnd daz dem also sei, darumb han ich vorgenanter Johans dem vorgenanten Andre geben disen prief vnd han gepeten den erbern richter hern Jacob von sant Michelspurch vnd den ofte genanten Perchtolt den Cholbeke mein vater, daz si ir paider insigel dar an gehenget habent zu^o ain vrchund der warhait. Dez sint geziuge her Albrecht von sant Lamprechtzperg, her Otte der Fulein, Heinrich hern Ebleins sun, Paul der Preve, Chunrad Nykeleins sun von Mauren vnd ander erber leut. Daz ist geschehen, da man zalt nach Christes gepurt dreuzehen hundert iar vnd dar nach in dem vir vnd dreizigisten iare, des Pfincztages vor Mitter vasten.

Source Fulltext: ZAHN, Codex Diplomaticus (=FRA II/35, Wien 1871) S. 214-215