Ich Nicla der Weniger burger ze Judenburch tu^on kunt vnd vergih offenlich an disem brieue, daz ich die swaige die ich gekauft hatte vmbe Seyfriden herrn Offen säligen sun von Winchlarn vmbe vierzig march silber, div swaige gelegen ist in dem Crumpecken, auf der swaige der Laiter gesessen waz weylent vnd auf der selben swaige nv sitzet Otte, div selbe swaige lehen ist von minem herren von Frisingen vnd von sinem gotzhause, die selben swaige han ich minem herrn bischof Chu^onrat ze Frisingen vnd sinem gotzhause verkauft vnd ze kaufenne geben mit allen den rehten so dar zue gehoerent vnd von alter gehoeret hant, besuecht vnd vnbesuecht, vmb vierzig march gewegens silbers, der vierzig march mich min herre bischof Chu^onrat vnd sin goczhaus gar vnd ganzlich gewert hat vnd verrihtet. Ich verzihe mich auch fuer mich vnd alle min erben aller der rehte so ich hatte ald gehan mag an der vorgenanten swaige, vnd ze ainem vrkunde aller der dinge so da vor geschriben sint7 so gib ich vnd han gegeben dem vorgenantem minem herren dem bischofe vnd sinem goczhause disen brief versigelt mit minem hangenden insigel. Der brief ist geben ze Welcz do man zalte von gotez gebuerte druezehen hundert iar vnd dar nach in dem vierden vnd drissigesten iare, an dem naehsten Sunentage vor sant Jerien (!) tag.

Source Fulltext: ZAHN, Codex Diplomaticus (=FRA II/35, Wien 1871) S. 218-219