Ich Jans vnd ich Orttl des Cholben svn von Judenburch vnd vnser erben wir vergehen offenleich mit disem prief vnd tuen chvnt allen den die in sehent oder horent lesen, das wir mit wol verdachtem muet vnd ze den czeiten da wir es wol getuen mochten, ain guet das gelegen ist ze Veustricz am Ort da Chuenrad auf gesessen ist, dem erwirdigen fursten bischoues Chuenraten ze Frising, seinem goteshaus vnd sein nachchomen verchauft habn vm zwelifthalb march silber, ye czwair myn sibenczig grosser Pehaymisch phenning vur ain march silber, der wir genczleich vnd gar gewert sein, vnd haben in das guet gebn gesuecht vnd vngesuecht, gepawen vnd vngepawen, leut vnd guet, mit allen den rechten vnd dar zue gehoren vnd wir es vnd vnser vordern in nucz vnd in gewer her habn pracht, vnd schullen in das vor genant guet peschermen vor aller ansprach als lehens recht ist in dem land ze Steyr, tet wir des nicht, swelhen schaden des der vorgenant vurste bischoue Chuenrad, sein goteshaus oder sein nach chomen nemen wie der schad genant sey den er oder sein goteshaus oder sein nach chomen ir ainer pey seinen trewen mag gesagen an allev ander pewerung, den schulle wir in genczleich vnd gar ab tuen an allev chlag vnd tayding vnd schullen das habn auf vns vnd auf alle dev vnd wir habn, das lubn wir in pey vnsern trewen an gever. Das im das stet vnd vnczeprochen peleib, dar vm geb wir im disem (!) offen prief versigelten mit vnser payder anhangenten insigel ze aim vrchund der warhait. Der prief ist gebn ze Welcz nach Christes gepurt dreuczehen hvndert jar vnd dar nach in dem vier vnd dreissigistem jar, an sant Mathei tag ze herebst.

Source Fulltext: ZAHN, Codex Diplomaticus (=FRA II/35, Wien 1871) S. 226-227