Ich Perenger der Vichdorfer vergich offenleich mit disem prief, das mich mein gnaediger herre pyschof Chu^onrat von Freysingen gewert hat zehen mark silbers gar vnd gaentzleich dar vmb ich Vlreich dem Schreiber purger ze Chostentz mein ros verchauft vnd ze chaufen gab vnd won ich aigens insigel niht enhab, so han ich im ze ainem offen vrchvnd disen prief gegeben versigelt mit her Emchen von Altzay Chorherren ze Freysingen vnd probst ze Wertse vnd mit Goetfritz von Anfeltz insigeln. Wir Emch von Altzay chorher ze Freysingen vnd probst ze Wertse vnd Go^etfrit Anfelt vergehent, das wir dur pet Perngers des Vichdorfers vnsere insigel habint gehenkt an disen prief ze ainem vrchvnd der vorgeschribnen werschaft. Dirre prief ist gegeben ze Weltz do von Christes gepurt ergangen warent druitzehen iar, dar nach in dem vier vnt drisgosten iar, des naehsten Maendags nach vnser Vrovwen tag ze herbst.

Source Fulltext: ZAHN, Codex Diplomaticus (=FRA II/35, Wien 1871) S. 226