Ich Herman der Fliezinger vergich offenlich an disem brief, daz ich meinem erwirdigem herren byschof Chuenraten ze Freysing verhaissen vnd gelobt han pei meinen trewen vnd pei meinen eren fuer mich vnd fuer mein erben, daz ich noch mein erben nichcznicht schuellen tuen noch wandeln mit den lehen die mir mein gnaediger herr byschof Chuenrat ze Freysing hat verlihen, die da gelegen sint ze Chu^ogellumpf vnd ze Eyratzuelt, vnd auch mit dem zehenten der da selb gelegen ist vnd auch anderswa, weder mit verseczen noch mit verchauffen noch auch chain ander wandlum da mit tuen, ez sei dann sein guet wille vnd gunst da pei, vnd swenn vnser herr byschof Chuenrat wil vnd ez an vns vodert, so schullen wir im vnd seinem goczhaus ze Freysing die selben lehen ze chauffen geben vnd die selben zehenten vmb vierczig pfunt alter Wienner pfenning an alle wider red vnd fuerzug. Vnd zu ainem vrchunde han ich meinem herren byschof Chu^onrat vnd seinem goczhaus ze Freysing disen brief geben versigelt mit meinem insigel. Der brief ist geben ze Waydhouen do man zalt von Christez gepurt drevczehen hundert iar, dar nach in dem vier vnd dreisigistem iar, dez nächsten Maentags nach sant Bartholomeus tag dez zwelif poten.

Source Fulltext: ZAHN, Codex Diplomaticus (=FRA II/35, Wien 1871) S. 225-226