Allen den die disen brief an sehent oder hoernt lesen chvnden wir Georg vnd Erhart prueder, Volchmars seligen svn von Hag vnd veriehen offenlich an disem brief, daz wir haben verchauft vnd ze chauffen geben vnser lehen an der Oed daz vnsers vater vnd vnser lehen ist gewesen von dem gotshaus ze Freisingen, das selb lehen heten wier ze chauffen geben vnserm steffater Albrechten dem Faevchsner, da wolt ims vnser herre der bischof niht leihen, vnd alle di phenning di er vns dar an geben het, die hat im vnser voergenanter herre bischof Chv^onrat von Freisingen geben vnd widercheret vnd allen den den ers gelten scholt, vnd auch den ers schuef an seinen lesten zeiten vnd auch seinen rehten erben, also das er sev vnd vns der phenning vmb daz egenant lehen an der Oed vnd swaz dar zue von alter gehoert hat, besuehts vnd vnbesuehts, mit holtz, mit veld, mit wismad, mit mvel vnd wie ez gehaizzen daz von alter zue dem lehen gehoert hat ald noch gehoert, daz haben wier im vnd seinem gotshaus ze Freisingen alles verchauft vnd ze chauffen geben vnd aufgeben vnd haben vns dar an aller rehten verzigen di wier dar an heten vnd gehaben mohten, gar vnd gaentzleich, wan er vnd sein gotshaus ze Freisingen habent vns vnd sev der siben vnd zwaintzig phunt phenning gar vnd gaentzleich geweret, dar vmb wier daz lehen ze chauffen gaben vnserm vorgenanten herren dem bischof von Freisingen vnd seinem gotshaus mit Wlfings des Faeuchsneres vnsers steffaters prueders rat vnd willen vnd mit Hermans des Hesibs vnd Chv^onrats des Prater vnd Rvemharts des Hager vnd mit ander vnser naegsten vreund rat vnd willen die pei dem chauffe sind gewesen. Vnd zue einem offen verchund vnd stetigung haben wier im, seinem gotshaus ze Freisingen disen brief geben versigelten mit Hermans des Hesibs vnd Chuenrats des Prater insigeln, wan wier selber aygner insigeln niht haben. So veriehen auch wier, ich Herman der Hesib vnd Chuenrat der Prater, daz wier durch pet der egenanten prueder Georges vnd Erhartz zue verchund vnd gezeug aller vor verschriben sache, wan wier auch bei dem chauff sein gewesen vnd ander erberig levt ier vreunde. Diser brief ist auch geben ze Vdmaruelt des iares dv man zalt von Christs gepuerd drevtzehen hundert jar vnd in dem vier vnd dreizgistem jar, an sand Johans tag ze Svnnbenden.

Source Fulltext: ZAHN, Codex Diplomaticus (=FRA II/35, Wien 1871) S. 223-224