Ich Heinreich vnd Hartweich Maenhartz saligen svn von Wagrain tven chvnt.vnd vergehen offenlichen an disem brief, daz wir haben verchauft vnd ze chauffen haben geben vnserm lieben herren byschof Chu^onraden von Freising vnd seinem gotshaus aller die gu^oter vnd daz gu^ot die wir hetten ze Riede in dem dorfe, besu^ocht vnd vnbesu^ocht, mit ellen (!) rehten so dar zv^o gehort vnd von olter (!) gehort habent, die selben gu^oter vnd gu^ot wir von vnserm herren von Frising vnd von seim gotshaus ze lehen haben gehabt, die gu^oter wir im vnd seinem gotshaus ze Frising haben verchauft vnd ze chauffen haben geben vmb dreizig pfunt alter Wienner pfenning, der selben pfenning wir von im vnd von seinem gotshaus gantzlich vnd gar gewert sein an beraiten pfenningen. Wir haben auch die selben gu^oter vnd gu^ot also verchauft vnd ze chauffen geben vnserm herren von Frising vnd seinem gotshaus, daz wir die selben gu^oter sullen wider chauffen von dem nachsten vaschange der nv schierist chvmt dar nach vber drev iar vmb dreizig pfunt alter Wienner pfenninge, moechten wir dez selben niht getven, so sol vnser herre von Frisinge ainen man nemen vnd wir auch ainen nemen, swas vns die mer haizzent geben, daz sol nam (!) vns geben in ainem moneit fuer der sprach geschieht. Vnd ze ainem vrchunde haben wir im vnd seinem gotzhaus ze Frising disen brief versigelt mit vnsern insigeln ze einer staetigunge aller der dinge die vor an disem brief geschriben stant. Diser brief ist geben ze Wagrain do man zaelt von Christes geburtt drevtzehen hvndert iar, dar nach in dem vier vnd dreizigistem iar, dez nachsten Maentags nach sant Vrbans tag.

Source Fulltext: ZAHN, Codex Diplomaticus (=FRA II/35, Wien 1871) S. 222