Ich Marichart vnd Erchenprecht die bruder von Mistelbach veriehen offenbar an disem priefe, daz wir dem erbern herren vnserm vetern hern Reinprechten von Eberstorf obristem chamrer in Osterich wider cher vnd wider legen schullen die zwen zehent, ein ze Schrikche vnd ein ze Perstorf da er taile mit vns an het, die selbm zehent schulle wir im wider legen auz den drin zehentten mit neun lehenten (!?) zehents der ainer leit ze Witawe vnd ainer ze Nevsidel vnd der dritte ze Entzeinstorf, vnd schol die wider legunge geschehen nach vnser muter tot. Wer aber daz wir ee furfueren, ee vnser muter sturbe des got nicht engeb, dennoch schol er die wider legung auf den vorgenantten zehenten haben, vnd geben im vnd sein erben dar vber disen prief versigelt mit vnsern insigeln zv einem warn gezevge diser sache. Der prief ist geben nach Christi geburt tausent jar, dar nach in dem fuemf vnd dreizkistem jar, an sant Getrauten tag.

Source Fulltext: ZAHN, Codex Diplomaticus (=FRA II/35, Wien 1871) S. 233-234