Nouerint vniuersi presentes litteras inspecturi, quod nos Chu^onradus dei gracia episcopus ecclesie Frisingensis ex vna et venerabiles ac religiosi viri Dyetricus abbas totusque conuentus monasterii in Seytensteten ordinis sancti Benedicti Patauiensis dyocesis ex parte altera voluntarie et ex certa sciencia de omni lite, questione et controversia que inter nos supradictos occasione noualium decimarum ecclesie in Gestnich, necnon vnius libre denariorum Wiennensium occasione cuiusdam pensionis ecclesie in Holnstein et cuiusdam feodi vulgariter dicti an dem Pach siti in parrochia Piberpach et pro parte domus site in ciuitate Waidhouen vertitur sev verti posset, pro nobis, ecclesia et monasterio predictis concorditer conpromisimus et consensimus in venerabilem patrem et dominum, dominum Laurencium Gurtzensis ecclesie episcopum et in honorabiles viros dominum Emchonem de Alczeia prepositum Werdensem et magistrum Hainricum canonicum Frisacensem et plebanum in Greytzenzteten electos et assumptos a nobis tamquam veros arbitros, commissarios sev arbitratores, laudatores sev amicabiles conpositores dantes, eis et concedentes plenam et liberam potestatem vt possint simul super premissis de piano sine strepitu et figura iudicii examinare, cognoscere, partes ad audiendum sentenciam sev preceptum vel ad alia citare, diem ad pronunciandum vel ad alia prefingere et prefixam prorogare, partem contumacem mulhtare (!), ita quod quicquid per illos tres arbitros sev arbitratores in prescriptes et infrascriptis fuerit concorditer factum et ordinatum, super eo possint ipsi et valeant auctoritate presentis conpromissi pronunciare, diffinire, arbitrari et prout ipsis expedire videbitur, terminare, ordine iuris seruato vel non seruato, diebus feriatis vel non feriatis, in scriptis vel sine scriptis et alias, qualitercumque et quandocumque, prout melias ipsis videbitur expedire, vtraque parte presente vel earum altera absente, dum tamen citata fuerit, et quod vnus pro se et sociis possit pronunciare et sentenciam legere consequenter. Conpromisimus etiam pro nobis, ecclesia et monasterio predictis per sollempnem stipulacionem stare, parere et obedire dicto laudo, pene, arbitrio et pronunciationi preceptis et terminacioni per eos faciendis et mox eis prolatis emulgare et approbare et in nullo contrauenire quacunque racione, causa sev modo, de iure vel de facto, per nos vel interpositas personas, quod si contra laudum, arbitrium sev pronunciacionem vel aliqua premissorum aliquis ex nobis conpromissariis de iure vel de facto faceremus vel veniremus per nos vel interpositas personas vt est predictum, promisimus sollempniter nobis inuicem et prefatis arbitris, quod pars arbitrium, laudum sev pronunciacionem in totum vel in partem non seruans, parti seruanti dabit et soluet pene nomine ducentas libras denariorum Wiennensium infra spacium duorum mensium a tempore violati compromissi, laudi sev arbitrii conputandum, ac nichilominus reficere et resarcire omnia dampna, expensas et interesse que vel quas fecit sev faciet, super quo suo stari volumus sacramento cui sine aliis probacionibus iidem plenam nobis placuit adhibere. Que omnia et singula promisimus sub pena premissa et ypoteka nostrarum rerum fideliter adimplere et obseruare. In cuius rei testimonium presentes appensionibus nostrorum sigillorum videlicet episcopi, abbatis et conuentus predictorum fecimus communiri, et quia capitulum Frisingense in rebellione est sedis apostolice et nostra episcopi memorati propter quod ipsius assensum habere nequimus, ideoque auctoritate et sigillo reuerendi in Christo patris et domini, domini Friderici sancte Saltzburgensis ecclesie archiepiscopi apostolice sedis legati metropolitani nostri presens conpromissum pet(i)mus roborari. Actum et datum anno domini millesimo trecentesimo tricesimo quinto, in castro Wienne, in vigilia Assumpcionis Virginis gloriose.||
Nos vero Fridericus archiepiscopus supradictus apostolice sedis legatus ad votiuam parcium dictarum instanciam prefatum conpromissum in omnibus suis capitulis sicut prouide actum et conpromissum est, confirmamus et sigilli nostri munimine communimus. Actum et datum anno predicto, XIII. kalendas Octobris.¹

Source Fulltext: ZAHN, Codex Diplomaticus (=FRA II/35, Wien 1871) S. 238-240