Ich maister Hainrich Widersacz der zimberman vergihe offenleich an disem brief, daz ich von meinem gnaedigen herren bischof Chu^onr. von Freisingen bestanden han daz mavrwerch ze Welz daz er da hat angeuangen, daz schol ich im gaentzleich machen vnd volbringen mit mavren, mit venstern, mit tueren vnd mit torn vnd mit gehowenn stainen, mit boedmen, mit estreichen vnd mit allen den gedingen alz er ez hat auzgetzaiget vnd fuergeben maister Seyfriden dem mavrer vnd ouch mir. Des Werdens drey gemawrte stuben, zwo gemawrte chamern vnd ain grozzes mu^oshaus von meins herren chemnaten veber vnd veber vnd ain chlaines mu^oshaus zwischen der duerntz vnd der alten chemnaten. In daz paw alles sampt werdent fueunf vnd zwainczik gehowenev venster, dev sol ich ouch gar beraiten. Ich sol ouch das rovchhaus an der nidern stuben vnd daz rovchhaus an der stuben auf der nidern stuben vnd daz rovchhaus an meins herren chamer auf derselben stuben dev drey rovchhaus sol ich allev machen vnd beraiten vnd sol sev allev drev in ain rovchhaus fueren. So sol ich dann an dem mu^oshause daz rovchhaus machen vnd daz rovchhaus an der chlainen stuben vnd sol dev zwai rovchhaus in ain rovchhaus fueren. So sol ich dann die priuet machen an dem orte gegen dem schu^ochster vnd sol die mawr von der erd auf fueren sechs eln hoch vnd sol die mavr sinwel machen an der priuet vnd sol die mavr haizzen betzevnen vnd bewerfen mit marter vntz oben auz. Vnd ze ainem vrchuend daz ich allez daz schuelle laisten vnd volfueren daz hie vor geschriben stet, han ich meinem vorgenanten herren von Freisingen disen brief geben mit Berchtolts des richters von Weltz anhangendem insigel versigelt daz er nach meiner bette an disen brief gehangen hat, wan ich aigens insigels nicht han. Ich Berchtold richter ze Welcz vergihe an disem brieue, daz ich durch maister Hainreichs des Widersatzes bette mein insigel an disen brief gehangen han ze ainem vrchu^end aller der dinge die hie vor geschriben stent, wan er aigens insigels nicht hat. Dirr brief ist geben ze Weltz do man zalt von Christes gebuert drevtzehen hundert iar vnd dar nach in dem fuenf vnd dreizzigistem iar, an dem Freitag nach sant V^olreichs tag.

Source Fulltext: ZAHN, Codex Diplomaticus (=FRA II/35, Wien 1871) S. 237-238