Ich Hainreich der Roetel purkgraf ze Haberberch vnd amptman zu den czeiten meins genaedigen herren byschof Chu^onrat ze Freisingen vergich offenleich vnd tu^on chu^ont allen den die disen brief sehent oder hoerent lesen, daz mir Perchtolt des Kneuschen aydem auf geben hat ain vyertail auz ainem vyertail mit allem dem recht alz er ez inne gehabt hat, vnd han ich das vargenant vyertail auz ainem viertail Dyemueten verlihen Niclas hausvrauwen mit allem dem recht als ez die hofmarch ze Inichingen her bracht hat vnd also als man cynslehen leihen sol, daz sy gewonleichen cyns da von geben sol alle iar iaerleich in meins herren chasten von Freysingen auf Haberberch. Darvber gib ich der vorgenanten Dyemueten disen offen brief mit meinem an hangunden insigl ze ainer vrchund der warhait. Der sache sint geczeuge her Dyetreich der Haberberger choerherre ze Innichingen vnd her Vlreich ab dem Taessenberch choerherre ze Innich(ingen) vnd Andree Phefferstoch vnd Pertel der sneyder vnd Merchel der Geyger an dem Perge vnd Pertel dises briefes schreyber vnd ander erber leut genueg. Ditz ist geschehen ze Innichingen in Pertleyns des sneyder hau^os do man zalt nach Christes geburt driwcehen hvndert iar vnd dar nach in dem siben vnd dreizzigisten iare, an sand Georii abent.

Source Fulltext: ZAHN, Codex Diplomaticus (=FRA II/35, Wien 1871) S. 250-251