Allen den di disen brief an sechent oder hoerent lesen chund ich Gedraut Otten seligen hausvraw von Henleinsperg vnd vergich offenleich mit disem brief, daz mir mein herre byschof Chu^onrat von Freising di gnad getan vmb di zway lechen ze Henleinsperg di im vnd seinem gotshaus ledichwaren warden vnd auch noch ledich sint von Otten meini wiert seligen, gar vnd gentzleich an den selben zwayn lechen chain recht het vnd noch nicht enhan, an daz mir mein herre byschoff Chu^onrat von Freising von seinen gnaden di zway lechen hat lazzen zu meinen lebtagen vnd nicht furbaz wan di weil ich leb, vnd sol noch enmag mit den zwayn lechen nichcznicht tu^on mit chainerslacht sache daz dem gotshaus schedleich sey, swie di sache gehaizen oder genant ist di dem gotshaus ze schaden mochten chomen an den zwayn vorgenanten lechen, wan daz di zway lechen ledichleich sullen gevallen an daz gotshaus ze Freising an alle chrieg vnd widerred, wan di zwai lechen sint hietzunt dem gotshaus veruallen vnd han ich chain recht dar zu^o wan daz ich di zway lechen haben vnd niezen schol zue meinen lebtagen vnd nicht furbaz, vnd sol vnd enmag nichcz nicht tuen mit den zwayn lechen daz dem gotshaus schedleich sey oder ze schaden mug chomen. Taet aber ich ichts icht dez got enwelle, mit den zwayn lechen oder mit twederm lechen daz dem gotshaus schedleich wer oder ze schaden chomen mocht, daz schol chain chraft haben gegen nieman. Ich schol auch alle iar von den selben zwayn lechen geben ze dienst in den chasten ze Vdmervelt an sand Merteins tach ain metzzen choern vnd ain metzzen habern alz ander sein vrbar, wan di zway lechen auch vrbar sint, wan daz ich di zway lechen haben vnd niezzen schol zu mein lebtagen vnd nicht furbaz. Dez sint zeug her Marchbart (!) der Luezeneker ritter, her Chuenrat der Zauchinger ritter, Chuenrat der Schewerbech, Herman der Hesib, Chuenrat der Prater, Ruemhart vnd Chuenrat di Hager brueder, Velreich der Prukpech chastner ze Vdmaruelt, Chuenrat Puechaw, Chuenrat Sunthaim vnd Fridreich der Sneider, vnd zue ainem vrchund daz ditz alles war vnd stet vnd vnzebrochen beleib, dar vmb han ich meinem herren bischof Chuenrat ze Freising vnd seinem gotshaus disen brief geben besigelten mit hern Marchbarts dez Luezeneker insigel vnd mit hern Chuenrats von Zauch insigel, mit Chuenrat Puechaws insigel, mit Chunrat Sunthaims insigel, mit Hermans Hesib insigel, mit Chunrats dez Prater insigel, mit Chunrats des Hager insigel, vnd mit Vlreichs dez Prukpechen chastner ze Vdmaruelt insigel wan ich aygens insigel nicht enhab, di alle da bey gewesen sint du mir mein herren (!) der byschof von Freising di gnad tet zue meinen lebtagen vnd ich mich auch verzech vnd auf gab allev di recht di ich het oder haben mocht an den voergenanten lechen, der han ich mich all verzigen vnd auch auf geben in meins herren byschof Chuenrats hant von Freising vnd seins gotshaus. Ich Marchbart der Luezneker ritter vnd ich Chuenrat der Zauchinger ritter vnd ich Chuenrat Puechaw vnd ich Chuenrat Sunthaim vnd ich Herman Hesib vnd ich Chuenrat der Prater vnd ich Chuenrat der Hager vnd Vlreich der Prukpech vergehen, daz wir durch vleizig pet der voergenanten vrawen Gedrauten vnser insigel gelegt haben an disen prief zu vrchund aller voergeschribner sache. Der brief ist geben zu Vdmaruelt, du man zalt von Christs geburd dreuzehen hundert iar, dar nach in dem siben vnd dreizichsten iar, dez nasten Samstages voer sand Michels tach.

Source Fulltext: ZAHN, Codex Diplomaticus (=FRA II/35, Wien 1871) S. 256-258