Ich Jans der Greyffe pei Vnser vrowen auf der Stetten ze Wienne vnd ich Anna sein hausvrowe wir veriehen vnd tvn chunt allen den die disen prief lesent oder horent lesen, die nv lebent vnd her nach chvnftich sint, daz wir mit alle vnserr erben guten willen vnd gunst mit verdachtem mvte vnd mit gesampter hant nach vnserr pesten vreunde rat zv der zeit do wir ez wol getan mochten, vnd auch mit vnsers lehenherren handen des erwirdigen fursten pyscholf Chunrats von Vreysingen recht vnd redelichen verchauft haben vnsers rechten erbegutes daz dorff Gaebelicz vnd den hoff vnd alles daz gut daz wir dacz Gebelicz gehabt haben, sybenthalb phunt phenninge dienstes vnd weysod sechs vnd vierczzich hvner die man dient ze Vaschang, vnd sechs vnd dreizzich chaese die man dient ze Phingesten, daz alles gerait ist fur acht phunt geltes auf behausten holden vnd pawes zv zwayn phlugen vnd dreiczehen leiten holce vnd wysemat, daz man achtet auf zwai hundert fuder, aynen weyr vnd ajnen pavmgarten des drev Joch sint, vnd ayn mvle vnd halber zehente der von dem pawen in den hoff gehoret, vnd allez daz dar zv gehoret ze holcz, ze velde vnd ze dorffe, ez sei gestift vnd vngestift, versucht vnd vnuersucht, swie so daz genant ist, daz haben wir allez verchauft vnd geben mit allem dem nueczze vnd rechte als ez von alten dingen her chomen ist vnd auch als ez mein vater her Greyffe gehabt hat vnd wir ez vnuersprochenlichen in lehens gewer her pracht haben, vmb fvmf hundert phunt Wienner phenninge der wir gar vnd genczlichen verricht vnd gewert sein, vnserm gnaedigen herren dem edeln vnd dem hochgebornen fursten herczzog Otten in Osterrich, in Steyr vnd in Chernden vnd seinen erben furbaz ledechlichen vnd vreilichen zehaben vnd allen iren frumen da mit ze schaffen, verchauffen, verseczzen vnd geben swem sev wellen als in daz aller peste chom vnd fuege an allen irresal, vnd durch pezzer sicherhait so seczzen wir vns, ich vorgenanter Jans der Greyffe vnd ich Anna sein hausvrowe vnuerschaidenlichen mit sampt vnsern erben dem egenanten vnserm herren herczog Otten in Osterrich vnd seinen erben vber daz vorgenante dorffe Gaebelicz vnd vber alles daz gut daz wir da gehabt haben, swie so daz genant ist, als vor geschriben stet, ze rechten gewern vnd scherm fur alle ansprache als lehens recht ist vnd des landes recht ze Osterrich, vnd swaz im furbaz mit rechte abe get, ob er dechainen chrieg oder ansprache dar an gewune, daz schullen wir im auzrichten an alles geverde vnd schol daz haben vnuerschaidenlichen auff vns vnd auff allem vnserm gut daz wir haben in dem lande ze Osterrich, wir sein lebentig oder tod. Vnd daz der chauf vnd dise rede furbaz also staete sei vnd vnczebrochen belibe, dar vber so geben wir im disen prief ze ainem offen vrchunde vnd ze ainem waren gezeuge vnd ze ayner ewigen vestnunge versigilten mit vnserm insigel vnd mit des vorgenanten vnsers lehenherren des erwirdigen fursten insigel pyscholf Chunrats von Vreysingen vnd mit der erbern herren vnd ritter insigel hern Albers des Cherbekchen, hern Jansen des Taler herczog Otten hoffemarschalch, hern Hagens von Spilberch vnser vrowen der herczoginne hoffemaister, her Symons des richter ze Newenburch, hern Christans des sluzzeler von Newenburch vnd hern Reynharts des Zavnruder zv den zeiten Juden richter ze Wienne die diser sache gezevge sint mit iren insigeln, vnd ander erber leute genuch den die sache wol chunt ist. Diser prief ist geben ze Wienne nach Christes geburt dreuczehenhundert iar, dar nach in dem syben vnd dreizzigistem iar, an sand Marie Magdelen tage.

Source Fulltext: ZAHN, Codex Diplomaticus (=FRA II/35, Wien 1871) S. 253-255