Wir Albrecht vnd Ott von gots gnaden hertzogen ze Osterreich, ze Steyr vnd ze Kernden, herren ze Chrain, auf der Marich vnd ze Portenawe, grafen ze Habspuerch, ze Chibuerch vnd lantgrafen ze Elsazzen veriehen vnd tuen chunt offenlich mit disem brief, daz wier duerch des erwirdigen bischof Chuenrats von Freysingen vnsers lieben vreunts vnd duerch seines gotshauses willen ze Freysing vnd duerch die getrewen dinst die er vns vnd sein gotshaus getan habent vnd noch alle tag tuent, vnd auch duerch die lieb vnd vreuntschaft vnd trewe die wier zu im vnd zu seinem vorgenanten gotshaus haben geben vnd erlaubet haben fuer vns vnd fuer vnser nachchomen im vnd seinem gotshaus ewichlich einen marcht ze haben ze Vdmerueld vnd der alle wochen an dem Vreytag da sein sol mit aller wandlung vnd suechung als auf andern merchten, vnd haben den da bestet mit vnsern willen vnd mit vnserr gunst vnd haben auch dem selben marchte alle die recht geben die ander merchte habent in vnserm lant ze Osterreich. Vnd des ze verchund geben wi\er disen brief versigelten mit vnsern insigeln. Der ist geben ze Wienne an Vreytag vor sand Peter vnd sand Pauls tag nach Christes gepurd dreutzehenhundert jar dar nach in dem syben vnd dreizigistem iar.

Source Fulltext: ZAHN, Codex Diplomaticus (=FRA II/35, Wien 1871) S. 251