Ich Rapot der Roesman purger ze Ybs verglich offenleich mit disem brief für mich vnd für mein hausvrowen Alhaiten vnd für alle vnser erben, daz ich recht vnd redleich verchauft han vnd ze choufen geben han dem erwirdigen herren bischof Chunrat von Freising vnd seinem gothaus (!) mein weingarten der gelegen ist ze Spicz, vnd an ainem tail stoezt an des voergenanten herren weingarten den er chauft hat vmb Hainreichen den Sachsen purger ze Waidhouen, vnd sint voermals di zwen weingarten ain waingart gewesen, vnd han im den selben Weingarten ze choufen geben vmb drev vnd zwainczich phunt alter Wienner phenning der ich .gar vnd genczleich gewert pin, wand er di selben phenning nach meiner pet geben hat Schevblein dem Juden von Ybs. Ich schol auch dem egenanten herren bischof Chunrat von Freising, seinen nachchomen vnd seinem gotshous den voergenanten weingarten scherinen nach perchrechts recht vnd dez landes recht ze Oesterreich. Pey disem chouf ist gewesen her Hainreich meins herren chapplan von Freising, her Chuenrat von Gruening sein schaffer, chorherr ze Mosburch, her Chuenrat von Zauch, her Ludweich von Roetenstain ritter vnd Gotfrid von Anueld, vnd zu ainem vrchund diczes choufes han ich im vnd seinen gotshaus disen brief geben versigelt (mit) meim insigel vnd mit der voergenanten herren insigeln di irev insigel habent gehencht vnd gelait zu meim insigel an disen brief durch mein vleizigev pet. Ich Hainreich chapplan meins erwirdigen herren bischof Chunrats von Freising vnd ich Chuenrat sein schaffer vnd ich Chuenrat von Zauch vnd ich Ludweich von Roetenstain ritter vnd ich Gotfrid von Anueld durch pet Rapots des Roesmans haben wir vnsrev insigel gehencht vnd gelait an disen brief ze Rapots insigel des Roesmans zu ainer offen gezeuchnuzz des choufes. Dierre brief ist geben ze Wienn, do man zalt von Christs geburd dreuzechen hundert iar, dar nach in dem aecht vnd dreizigistem iar, an sand Vrbans tach.

Source Fulltext: ZAHN, Codex Diplomaticus (=FRA II/35, Wien 1871) S. 263