Ich Chuenrat der Chelner ze Vegenperg vnd ich Kathrey die Chelnerin vergiehen mit disem brief vnd tuen kunt allen den die in sehent ald horent lesen, daz wir mit wol verdahtem muet vnd mit guetleichen willen aller vnserr erben vnd vreunt vnser hueb ze Wenigen Vegenperg die wir ze rehtem lehen gehabt haben von vnserm gnedigen herren bischof von Freisingen vnd von seinem gotshaus, daz haben wir reht vnd redleich ze chauffen geben vnd verchauft vnserm egenanten gnedigen herren bischof Chunraten vnd seiner nevstift dem spital ze Vdmaruelt mit allen rehten vnd nutzen, besuehten vnd vnbesuehten, ze velden, ze holtz oder wie ez genant sei, als wiers enher gehabt haben, vnd verzeihen vns aller rehten dar auf die wier habt (!) haben oder gehaben moehten, an das wier chaufreht dar auf haben daz vns der egenanten (!) herre bischof Chunrat von seinen gnaden dar auf gelihen hat, also daz wier dem voergenantem spital ze Vdmaruelt ze rehtem dienst alle iar da von dienen schullen wier oder swem wier daz geben, zwaintzig metzen rokken vnd zwaintzig metzen habern chastmazz vnd mit allen sachen dem selben spital vnd seinen phlegern ze warten mit gelt, mit vngelt, als ander des selben spitals levt. Sust alle vnser rehten die wier dar auf heten vnd gehaben mohten, die haben wier verchauft vnd ze chauffen geben vnserm obgenanten gnedigen herren bischof Chunraten von Freisingen vnd seinem spital ze Vdmaruelt ledichleich vmb sechczehen phunt alter Wienner phenning der wier von im vnd von seins spitals ze Vdmaruelt phleger Vlreichen dem Prukpechen gaentzleich gewert sein vnd bezalt mit beraiten phenning, vnd seind wier aygen insigel niht haben, geben wier dem voergenanten vnserm herren bischof Chunraten von Freisingen vnd seinem spital ze Vdmaruelt disen offen brief mit hern Marquards des Luesnicher ritter vnd mit Hermans des Hesibs vnd mit Chunrats des Hager mit diser dreyer hangunden insigeln besigelten ze verchund vnd ze zevgen aller ||
vor verschriben sache. Ditz ist geschehen ze Vdmaruelt vnd ist der brief geben des iares, do von Christs gepurd ergangen waren dreuczehen hundert iare vnd in dem aht vnd dreizgistem iar, an sand Kathreyn tag.

Source Fulltext: ZAHN, Codex Diplomaticus (=FRA II/35, Wien 1871) S. 264-265